A melidense Yara González Barral gaña o 2º premio de Novos Deseñadores do Encaixe de Camariñas

Un total de 38 mozos que están a dar os seus primeiros pasos no mundo da moda presentáronse a estes galardóns

Laura Moure/Melide

A xornada de clausura da XXXIV Mostra de Encaixe de Camariñas da Deputación da Coruña serviu para coñecer aos gañadores do XXXI concurso de Novos Deseñadores, entre eles unha melidense.

Publicidade

Preme na imaxe para obter máis información do evento.

O primeiro premio, outorgado pola alcaldesa de Camariñas, Sandra Insua, recaeu en Estefanía Orgaz e Pedro Orgaz, que conquistaron ao xurado profesional coa súa colección. Mitra. O responsable da planta Stolt Sexa Farm Vilán, José Figueroa, entregou o premio a Ritual de lume e sombra, da melidense Yara González Barral, quen quedou en segundo lugar; mentres a colección Píntao de cores de Lucía Janeiro, Clara Rey e Antonio Soto que recibiron o premio de mans da responsable de relacións institucionais de Frigoríficos de Camariñas, Verónica Canosa; logrou o terceiro posto. O cuarto premio, entregado pola presidenta da Asociación de Empresarios e Promoción Turística de Camariñas, Olga Campos, recaeu en Onintze Aramburu e Sofía Puertas, con Aparencia. 

Nesta edición repartíronse un total de 4.500 euros en premios repartidos da seguinte maneira: un primeiro premio de 2.100 euros, un segundo de 1.200 euros, un terceiro de 700 euros e un cuarto de 500 euros.

Yara González, en primeiro plano, mostrando a súa colección gañadora.

Yara González é de Melide, ten 24 anos e estudou deseño de moda na Easd Mestre Mateo, que rematou o ano pasado e agora está facendo patronaxe e confección na Academia Susa Suárez en Santiago. "Quedar de segunda no concurso de Camariñas para min é un gran recoñemento ao traballo que levo facendo nos últimos tres meses deseñando e confeccionando a colección. Había moita competencia; os meus compañeiros tiñan coleccións moi interesantes e ao ver que me escolleron a min entre todos alégrame moito", contános a melidense.

Un total de 38 mozos que están a dar os seus primeiros pasos no mundo da moda presentáronse a estes premios. As orixes dos novos deseñadores foron moi diversos, formados nas mellores escolas a nivel estatal. O xurado estivo composto polos seguintes deseñadores: Modesto Lombra, Charo Carrillo, Ana Cabranes, Claudina Mata e Francisco Basteiro.

Publicidade

Preme na imaxe se queres contactar connosco.

Na cerimonia de clausura, a concelleira de Encaixe, Encarna Liñeiro, afirmou que "a Mostra é un evento que conserva a súa esencia máis pura, pero que soubo evolucionar, crecer e adaptarse aos novos tempos sen perder a súa identidade. Hai anos deixou de ser só un escaparate de artesanía; hoxe é unha pasarela de referencia no mundo da moda, recoñecida en todo o país".

No seu discurso, destacou que "este ano o noso Mar de Piques representou esa forza colectiva, esa artesanía de salitre e talento que nos identifica. Porque aquí, entre piques, deseños, libros, concertos e moita emoción… seguimos tecendo o futuro. Pasamos días escoitando o son dos escarvadentes, vendo sorrisos, intercambiando palabras co público, cos expositores, cos recolectores… e todos coincidimos: Camariñas ten algo único. E por iso, volveremos o ano que vén, con novas ideas, novos proxectos e a mesma ilusión de sempre".