A feira Festur 2025 medra e mostrará do 5 ao 8 de xuño en Silleda o atractivo de 60 festas galegas

Celebrarase conxuntamente co salón de turismo Turexpo Galicia e de ç forma paralela á 47ª Abanca Semana Verde de Galicia

Laura Moure/Silleda

A XI Feira de Festas de Interese Turístico, Festur 2025, celebrarase do 5 ao 8 de xuño conxuntamente co salón de turismo Turexpo Galicia e de forma paralela á 47ª Abanca Semana Verde de Galicia. Unha cita que conta co apoio da Axencia Turismo de Galicia e que nesta edición reúne a 60 festas de interese turístico das catro provincias galegas, a maior cifra dende a posta en marcha deste certame, no ano 2014.

Estas festas de interese turístico, con recoñecemento de carácter internacional, nacional ou de Galicia, están presenta a través de 45 concellos e xeodestinos, os cales mostran vistoso material destas festas. Ademais, parte deles realizarán actividades tanto nos seus stands como nunha área común da feira, con degustacións ou exhibicións, en función do seu carácter.

Así, están presentes a Festa do Pemento da Arnoia; Virxe da Franqueira, da Cañiza; Festa da Troita da Pontenova; Romaría de San Ramón de Bealo, de Boiro; Festa da Filloa de Lestedo e Alto dos Xenerais do Ulla, de Boqueixón; Romaría Viquinga de Catoira; Folión de Carros de Chantada; Semana Santa e As Pebida de Ferrol; Festa da Castaña e Filandón de Músicas de Folgoso do Courel; Feira do Cocido, de Lalín; O Naufraxio, de Laxe; Mostra de Olería de Buño e Romaría de Santo Hadrián, de Malpica de Bergantiños; Entroido de Manzaneda; As San Lucas, Semana Santa e Mercado Medieval, de Mondoñedo; Xuntanza Internacional de Gaiteiros, de Monterrei; Feira de Santos de Monterroso; Gran Premio de Carrilanas de Esteiro, de Muros; e Romaría da Nosa Señora da Barca de Muxía.

Tamén terán presenza a Festa da Troita de Oroso; Festival Internacional do Mundo Celta de Ortigueira; Festa do Pemento de Herbón e A Pascua, de Padrón; Mostra do Aceite de Quiroga; Romaría da Saínza de Rairiz de Veiga; Festa da Istoria e Feira-Exposición de Exaltación do Viño da Zona do Ribeiro, de Ribadavia; Festa da Dorna de Ribeira; Festa do Polbo de Ribeiro-O Carballiño: Sardiñada de Sada; Festa do Viño de Amandi, de Sober; Queima das Fachas de Taboada; Alto dos Xenerais do Ulla de Teo e Vedra; Festas Patronais de San Telmo, de Tui; Semana Santa, Romaría do Naseiro e Rapa das Bestas, de Viveiro; Galo de Curral, de Vila de Cruces; e San Roque e Festa da Ameixa de Carril, de Vilagarcía de Arousa.

Publicidade

Preme na imaxe se queres contactar connosco.

Exhibicións, showcookings e degustacións

Ademais das celebracións citadas, haberá outras que realizarán actividades destacadas dentro do programa da feira. Así, realizarán exhibicións as palilleiras da Mostra do Encaixe de Camariñas e os Xenerais do Ulla de Bandeira (Silleda) e de Fao e Bama (Touro), mentres que O Corpus de Ponteareas elaborará unha das súas alfombras.

Ademais, levarase a cabo o showcooking “Festa do Queixo de Arzúa”, a cargo do chef Diego Mato Castro e Efa Piñeiral, e ofrecerán degustacións dos produtos e pratos exaltados nas súas festas, a de Xamón da Cañiza; Pataca de Coristanco, Carneiro ao Espeto de Moraña, Pan de Cea de San Cristovo de Cea, Empanada de Bandeira e a Tortilla de Laro, de Silleda; Asalto ao Castelo e Faguía do Carnés, de Vimianzo; Pescada do Pincho de Celeiro, de Viveiro, e Bonito de Burela.

Así mesmo, algúns dos concellos presentes tamén ofrecerán degustacións doutras das súas festas locais.