A Deputación distinguirá ao Concello de Silleda nos Premios de Boas Prácticas en Igualdade

A entrega será en novembro e nelas serán recoñecidas entidades de Cambados, Cangas do Morrazo, A Lama, Marín, Moaña, Pontevedra, Silleda, Vigo e Vilagarcía de Arousa

Laura Moure/Silleda

A Deputación de Pontevedra distinguirá un total de 11 entidades da provincia, entre eles o Concello de Silleda, na segunda edición dos Premios de Boas Prácticas en Igualdade, cos que a institución provincial busca recoñecer aquelas persoas e entidades que realicen actividades, proxectos ou programas que destaquen na consecución da igualdade de xénero e a erradicación da violencia de xénero. A cerimonia de entrega dos galardóns, que repartirán 16.000 euros nos eidos da cultura, do deporte, da educación e do medio social, terá lugar durante o mes de novembro.

Frases pintadas de igualdade 8M concello de Silleda no ano 2023.

Na categoría de mellor iniciativa social o primeiro premio recae na Morada Nosa (Vigo) e o accésit á Fundación Érguete-Integración (tamén de Vigo). Na categoría de mellor iniciativa cultural, recibe o primeiro primeiro premio a Asociación Civio Cultural Xiria (Cangas do Morrazo) e o accésit a Asociación Teatro Compañía Caracol (Cambados). Na categoría de mellor iniciativa deportiva, o primeiro premio vai parar a Traviesas Hockey Club (Vigo) e o accésit á Asociación Libélulas BCS Pontevedra. Na categoría de mellor iniciativa educativa, a Deputación distingue co primeiro premio o CEIP Rosalía de Castro de Vilagarcía de Arousa e co accésit o CEIP Plurilingüe Domaio (Moaña). Ademais, outorgaranse tres distincións honoríficas ao Centro Penitenciario da Lama, o Concello de Silleda e o Centro de Información á Muller de Marín.

Os Premios de Boas Prácticas en Igualdade recoñecen aquelas entidades ou persoas físicas que realicen actividades ou proxectos sobre a igualdade de xénero ou a erradicación da violencia de xénero, tamén destinadas a romper cos estereotipos de xénero ou que incorporen a igualdade de oportunidades en proxectos educativos.

Publicidade

Preme na imaxe se quere contactar connosco.

A proposta gañadora de cada categoría recibe unha gratificación de 3.000 euros, mentres que os accésit reciben 1.000 euros. As mencións honoríficas entréganse a persoas físicas, entidades locais, entidades sociais e organismos públicos que desenvolvan unha traxectoria inapelable a prol da igualdade entre mulleres e homes.