A Deputación celebra o Día Internacional da Fotografía en Melide cun tributo a Mary Quintero

Será o14 de agosto e haberá un obradoiro práctico de retrato e, posteriormente, unha proxección e faladoiro na Casa do Concello

Laura Moure/Melide

Con motivo do Día Internacional da Fotografía, que se conmemora o vindeiro 19 de agosto, as áreas de Cultura e Igualdade da Deputación da Coruña únense para celebrar unha xornada especial dedicada á figura de Mary Quintero, referencia indispensable da fotografía de estudio e da cultura visual galega do século XX. O evento terá lugar este venres, 14 de agosto, na vila natal da homenaxeada, Melide.

A xornada nace co obxectivo de achegar á cidadanía a traxectoria dunha creadora que, ao longo de máis de sete décadas de oficio, converteu a fotografía nunha ferramenta clave para retratar persoas, conservar a memoria colectiva e documentar as transformacións sociais do país. Ao mesmo tempo, a iniciativa busca poñer o foco nas barreiras que enfrontaron as mulleres pioneiras no sector e promover a reflexión sobre a imaxe como patrimonio e expresión artística.

 PUBLICIDADE

Preme na imaxe para obter máis información deste evento.

Obradoiro práctico de retrato (Inscrición previa)

A programación botará a andar ás 11:30 horas co obradoiro práctico "A arte do retrato", impartido pola fotógrafa e fotoxornalista Laura Niederleytner. A actividade, dirixida a público a partir de 16 anos, afondará nas nocións básicas do retrato contemporáneo —a luz, a composición, a expresión e o vínculo entre a fotógrafa e a persoa retratada—, un dos xéneros que mellor definen a obra de Quintero.

PUBLICIDADE

Preme na imaxe para obter máis información do evento.

Dado que o obradoiro conta cun número máximo de 15 prazas, a participación adxudicarase por estrita orde de inscrición. As persoas interesadas poden reservala enviando un correo a cultura@concellodemelide.gal ou unha mensaxe de WhatsApp ao 679 132 720.

 PUBLICIDADE

Preme na imaxe para obter máis información do evento.

Proxección e faladoiro na Casa do Concello

Pola tarde, a actividade trasládase á Casa do Concello de Melide, con entrada libre ata completar aforo:

• 19:30 horas · Proxección do documental: Emitirase Mary Quintero. Máis de 90 anos de creatividade, dirixido por María Ojea, unha peza que percorre a vida da artista e a evolución da fotografía en Galicia, destacando a importancia dos arquivos na construción da memoria histórica.

• 20:20 horas (aprox.) · Coloquio interxeneracional: A xornalista Claudia Morán conducirá o faladoiro "A fotografía como oficio, creación e memoria", no que participarán a propia Mary Quintero, Laura Niederleytner e a artista visual Andrea Costas. O encontro servirá para debater sobre a evolución do oficio, o retoque fotográfico fronte ás novas tecnoloxías como a IA e a importancia dos referentes femininos no sector visual.

  PUBLICIDADE

Preme na imaxe para obter máis información.

Unha oportunidade única para recoñecer o talento das pioneiras galegas, aprender da súa mirada e seguir construíndo un futuro con máis referentes femininos na cultura.