A concelleira de Ramala Hanan Kaoud comparte en Silleda a realidade de Palestina

 No encontro participaron tamén alumnas e alumnos de 1º de Bacharelato do IES Pintor Colmeiro, que tiveron ocasión de escoitar e dialogar coa concelleira palestina

Laura Moure/Silleda

A concelleira de Ramala (Palestina), Hanan Kaoud, foi recibida onte pola alcaldesa Paula Fernández Pena e por integrantes do goberno municipal no marco da súa visita a Galicia promovida polo Fondo Galego de Cooperación e Solidariedade, do que forma parte o Concello de Silleda. No encontro participaron tamén alumnas e alumnos de 1º de Bacharelato do IES Pintor Colmeiro, que tiveron ocasión de escoitar e dialogar coa concelleira palestina, especialista en políticas de igualdade e defensora dos dereitos humanos.

Hanan Kaoud explicou que o conflito árabe-israelí se remonta á ocupación dos territorios palestinos e ao proceso de colonización iniciado hai décadas. “O xenocidio non comezou en 2023, senón en 1947”, sinalou, poñendo o foco na situación que se vive hoxe tanto en Gaza como en Cisxordania. Subliñou tamén a resistencia do pobo palestino e o papel fundamental da solidariedade internacional.“Sobrevivimos grazas ao apoio e á solidariedade da xente, de pobos como o voso e de moitos países que nos apoian”, afirmou.

A edil referiuse especialmente á situación das mulleres palestinas, que sofren as consecuencias da guerra e da ocupación con maior dureza, “afrontando riscos, mesmo cando se desprazan entre territorios controlados, con medo a posibles agresións sexuais”.

Na súa intervención, a alcaldesa Paula Fernández Pena destacou que neste tempo de lembranza e denuncia polo 25 de novembro, Día Internacional contra a Violencia de Xénero, é importante poñer o foco tamén nas mulleres que viven en territorios en conflito.

“A guerra arrinca vidas e destrúe comunidades, pero tamén revela a valentía e a dignidade de tantas mulleres que resisten. Hoxe temos o privilexio de contar cunha delas: Hanan Kaoud, que representa esa outra cara da guerra, a das mulleres que traballan pola paz e a xustiza desde as institucións locais”, subliñou a rexedora.

Tamén interveu Ángela Troitiño, concelleira de Igualdade, quen destacou a importancia de encontros como este “para sensibilizar e promover valores de igualdade e solidariedade entre a mocidade”. Pola súa banda, Carmen Novas, técnica do Fondo Galego, agradeceu a acollida do Concello e explicou o obxectivo deste programa de visitas: “Poñer voz ás mulleres que viven en territorios ocupados e darlles espazo nos concellos galegos para que o seu testemuño contribúa á reflexión colectiva”.

Ao remate do acto, a alcaldesa fixo entrega a Hanan Kaoud dun pequeno recordo simbólico en nome de todo o pobo de Silleda, lembrando a bandeira solidaria co lema “Silleda con Palestina”, que ondeou nos últimos días na fachada do Concello como mostra de apoio e irmandade co pobo palestino. Kaoud tamén asino no Libro de Honra do Concello de Silleda, amosando o seu agradecemento polo apoio ao pobo palestino.

Hanan Kaoud valora enormemente as mobilizacións da sociedade civil en diversos países europeos e tamén as iniciativas de gobernos locais como as charlas que está a impartir en Galicia, xa que “este tipo de accións nos dan forza e son fundamentais para apoiar a causa”, asegura. “Imos seguir loitando pola nosa dignidade. Só cando pare a ocupación seremos libres. A ocupación é ilegal e ten que parar”, concliu recomendando aos asistentes ler e informarse sobre a realidade de Palestina.

O Fondo Galego

O Fondo Galego de Cooperación e Solidariedade está integrado por 118 concellos e as catro deputacións de Galicia, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur Global e a sensibilización da sociedade galega a prol da solidariedade internacional. Recoñecido como axencia municipal da cooperación galega, o Fondo Galego vén de cumprir 28 anos

tendo apoiado uns 200 proxectos en máis de trinta países e promovendo numerosas actividades e materiais en relación aos desequilibrios Norte-Sur e a Axenda 2030.

Hanan Kaoud, que estes días está a visitar varios municipios galegos, é especialista en Políticas e Xustiza de Xénero, con máis de 30 anos de experiencia en gobernanza, dereitos humanos e igualdade de xénero en toda a rexión de Oriente Medio e Norte de África. Ten desempeñado un papel fundamental na elaboración de políticas sensibles ao xénero, na incorporación da perspectiva de xénero en mecanismos de protección e no fortalecemento da resiliencia comunitaria. Kaoud promoveu activamente a participación das mulleres nos ámbitos político e económico, elaborou completos manuais de transversalización do xénero e liderou accións de incidencia sobre cambio climático, dereito á saúde e violencia de xénero.

Publicidade

Preme na imaxe se quere contactar connosco.

Como electa do Concello de Ramala (Cisxordania), Hanan Kaoud contribúe de maneira significativa á gobernanza local a través da súa participación en varias comisións municipais. Forma parte dos comités de Participación Comunitaria, Finanzas, Investimentos, Medios de Comunicación e Planificación Urbana, e actualmente preside o Comité de Supervisión e Control, desde o que promove a transparencia, a rendición de contas e a toma de decisións inclusiva.

Kaoud é tamén membro activa dos comités de Igualdade de Xénero da Unión de Cidades e Gobernos Locais, impulsando as axendas globais para unha gobernanza urbana inclusiva. Conta con estudos avanzados en Xénero e en Dereitos Humanos e Democracia, e a súa traxectoria profesional inclúe funcións como especialista nacional en xénero, planificadora estratéxica para a igualdade de xénero e mentora. O seu traballo demostra de maneira constante un profundo compromiso coa promoción da xustiza de xénero, os valores democráticos e os dereitos humanos tanto a nivel local como internacional.