A carpa da Feira do Cocido de Lalín reunirá máis de medio cento de postos

Participarán 42 solicitantes con 51 postos dedicados á gastronomía, á artesanía e á actividade industrial

Laura Moure/Lalín

A concelleira de Turismo de Lalín, Begoña Blanco, informou de que a carpa do Cocido contará nesta edición cun total de 51 postos distribuídos entre 42 participantes, o que supón “unha das edicións con maior representación dos sectores vencellados á tradición gastronómica e cultural do Cocido”.

Segundo explicou a edil, o maior peso da carpa corresponderá ao ámbito da alimentación, das carnes e dos produtos derivados, cun total de 23 participantes que ocuparán 32 postos. Trátase, segundo indicou, de negocios ligados á elaboración e venda de produtos gastronómicos tradicionais, conservas, embutidos e outros alimentos transformados, “que son unha parte esencial da identidade da feira e do atractivo que ofrece ao público visitante”.

 Publicidade/DOAZÓN PARA ECOS DA COMARCA

Xunto a este sector, a concelleira destacou a presenza da artesanía, que contará con 15 participantes e 19 postos, dedicados a diferentes oficios e creacións artesanais. “A carpa permite dar visibilidade a traballos manuais e pezas elaboradas con técnicas tradicionais, que complementan a oferta gastronómica e reforzan o carácter cultural do Cocido”, sinalou Begoña Blanco.

A oferta complétase cun posto de carácter industrial, que contribúe a amosar outras actividades económicas vinculadas ao tecido produtivo local e comarcal, “ampliando a visión da feira máis alá do estritamente gastronómico”.

 Publicidade

Preme na imaxe para obter máis información.

Lugar de encontro

A concelleira puxo en valor a variedade da carpa, subliñando que “non se trata só dun espazo de venda, senón dun lugar de encontro entre produtores, artesáns e público, no que se pode coñecer de primeira man a riqueza de actividades que xiran arredor da Feira do Cocido”.

Begoña Blanco destacou tamén que a distribución dos postos e a diversidade de sectores “permiten ofrecer unha experiencia máis completa tanto á veciñanza como ás persoas que visitan Lalín durante a feira”, ao tempo que se apoia ao pequeno comercio, á produción artesanal e ás iniciativas económicas ligadas á tradición.

Publicidade

Preme para contactar con nós e pregunta polas tarifas que son unha bicoca!

Por outra banda, a concelleira anunciou que o vindeiro día 15, día que coincide co inicio do Mes do Cocido, comezará a instalación da propia carpa, de 85X25 metros que acollerá unha parte importante das actividades relacionadas coa Feira. Estará instalada arredor de un mes, tendo actividades todas as fins de semana.