A 30ª Festa do Melindre de Melide presentarase o vindeiro xoves no Mercado de Abastos de Santiago

Incluirá un café solidario con melindres ao prezo de dous euros cuxa recadación que se destinará en axuda directa ao pobo ucraíno

Laura Moure/Melide

O Concello de Melide presentará o vindeiro xoves, 7 de abril, o 30 aniversario da Festa do melindre e da repostaría tradicional de Melide, que terá lugar os días 7 e 8 de maio, con actividades previas desde o xoves 28 de abril. O acto terá lugar na aula gastrocultural do Mercado de Abastos de Santiago a partires das 12:00 horas e e estará precedido desde as 10:30 horas dun café solidario con melindres ao prezo de dous euros cuxa recadación que se destinará en axuda directa ao pobo ucraíno a través da ONG Itínera Faciendo Nenos de Ucraína en Galicia. Nos actos colaborarán cedendo produto a Asociación de repostaría tradicional Melide Terra Doce, o café Arraigos de Melide, e as entidades Coffee Spirit e CLUN, cooperativas lácteas unidas.

Entre as novidades que se avanzan para 30 aniversario, atópase unha exposición conmemorativa das tres décadas de evento con paneis informativos e fotográficos, que se inaugurará en Melide o venres 29 de abril.

O programa completo da trixésima edición da festa presentarase oficialmente logo de ter xa realizado diferentes actividades de promoción previa durante os meses de setembro a marzo por toda Galicia que formaron parte da programación e consistiron en diferentes obradoiros impartidos por Alberto Rodríguez, presidente da Asociación de repostaría tradicional Melide Terra Doce, así como varias catas e maridaxes en colaboración co Consello Regulador da II.XX das Augardentes e Licores Tradicionais de Galicia. Visitáronse os centros de formación CIFP Compostela en Lamas de Abade, o Belarmino Fernández no concello de Sober, a EFA A Cancela e As Neves, e a EFA Piñeiral de Arzúa.

Ademais, realizáronse promocións do evento e do produto coa presenza en feiras como FESTUR en Silleda, Xantar Expourense, a Festa do Queixo de Arzúa, ou no programa Quen anda aí da CRTVG.

A Concellería de Promoción Económica continuará anunciando nas próximas datas as seguintes actividades da promoción da festa máis doce de Galicia.