A Alternativa Veciñal de Antas de Ulla propón crear unha comunidade enerxética pioneira na Ulloa

Ecos da Comarca/Antas de Ulla

A Alternativa Veciñal de Antas de Ulla (AVA) propón a creación dunha comunidade enerxética pioneira na Ulloa. O grupo municipal rexistrou unha moción para impulsar o autoconsumo fotovoltaico e a creación de comunidades enerxéticas no municipio.

As comunidades enerxéticas son proxectos colectivos en que persoas físicas e outras entidades locais como negocios ou concellos asócianse para xestionar a súa propia enerxía. Teñen como obxectivo fomentar a xeración renovable distribuída e desenvolvemento local, permitindo a participación directa das persoas no mercado eléctrico, á vez que se xeran beneficios sociais e ambientais. Esta figura é unha proposta da Unión Europea, e os Fondos de Recuperación Transformación e Resiliencia están a dar un impulso forte á transición enerxética, sendo o autoconsumo un dos grandes beneficiados.

Numerosos municipios españois, explica, están a impulsar comunidades enerxéticas cedendo cubertas de edificios municipais para aloxar instalacións fotovoltaicas de modo que a enerxía producida sirva para o autoconsumo do propio edificio e para reducir a factura das familias situadas nas súas inmediacións e que desexen adherirse ao modelo.

A iniciativa de AVA pasa por crear, como proxecto piloto, unha Comunidade Enerxética Local, impulsada polo Concello da que tamén formen parte veciños e veciñas e empresas locais (como por exemplo algunha instalación gandeira), para deixar de lado os combustibles fósiles e poñer as novas fontes renovables ao servizo do común.

Preme na imaxe se queres contactar connosco!

"Na mesma moción tamén pedimos que por parte do Concello se impulsen accións de

sensibilización e formación sobre o autoconsumo fotovoltaico na comunidade, e que se

traballe para que a entidade local sexa un punto de información para a creación de

comunidades enerxéticas no noso municipio. Así como que se estudie realizar instalacións de autoconsumo compartido para os consumos municipais e a rede de iluminación pública. Dende AVA poñemos en valor o autoconsumo, pero tamén a soberanía e con isto o que facemos é xerar independencia e unir á comunidade", recalca.