Veciñanza denuncia a instalación dunha antena de telefonía na área fluvial de Vilar das Donas, en Palas

A Orde das Donas e Cabaleiros do Priorato de Vilar das Donas Os Lobos acaba de remitirlle unha carta ao alcalde do municipio para expresar o seu malestar por isto

Ecos da Comarca/Palas de Rei

A Orde das Donas e Cabaleiros do Priorato de Vilar das Donas “Os Lobos” de Palas de Rei veñen de remitir unha carta ao alcalde deste municipio, Pablo Taboada, para trasladarlle a súa preocupación pola instalación dunha antena de telefonía móbil na área fluvial desta parroquia palense. Ademais, están a difundir información entre a veciñanza ante o que consideran unha falta de comunicación institucional.

Segundo explican, hai unhas semanas colocouse unha primeira antena, aparentemente provisional, no acceso á área desde a estrada LUP-4005 (Ferradal–Vilar das Donas). Porén, nos últimos días observaron a instalación dunha segunda infraestrutura de maior tamaño, xa de carácter fixo, situada a carón do edificio de servizos e no propio espazo de lecer.

Os residentes amosan o seu malestar pola colocación desta torre de telecomunicacións nun enclave público frecuentado e moi próximo á aldea do Ferradal. Aseguran que, aínda que comparten a necesidade de mellorar a cobertura móbil en zonas rurais, non están de acordo co procedemento seguido nin coa localización escollida.

 PUBLICIDADE

Se queres obter máis información do evento preme na imaxe.

Entre as principais críticas, destacan a falta de información previa á veciñanza sobre o proxecto, as súas características e o posible impacto. Tamén cuestionan a elección dunha área recreativa que, lembran, foi recentemente acondicionada cun investimento superior aos 100.000 euros.

Ademais, sinalan que existen alternativas viables para a instalación da antena que permitirían prestar o mesmo servizo sen afectar a un espazo público de lecer nin situarse tan preto de núcleos habitados.

 PUBLICIDADE

Preme para obter máis información.

Baixo o lema “Dar servizo si, pero con sentidiño”, os veciños solicitan a paralización inmediata das obras e o traslado da infraestrutura a unha localización máis axeitada. Así mesmo, animan á cidadanía a informarse e a expresar o seu rexeitamento á actual instalación.