Unto Vello presenta o seu álbum Inmaterial en Arzúa o 25 de abril

Será de entrada libre e gratuíta ata completar a capacidade

Laura Moure/Arzúa

O Departamento de Cultura do Concello de Arzúa organiza un concerto do grupo Unto Vello que presentará este sábado na Casa da Cultura o seu último traballo titulado Inmaterial, un dos actos máis destacados da programación Primavera de cultura. A actuación musical será este sábado, 25 de abril, ás 20:30 horas con entrada libre e gratuíta ata completar a capacidade. A apertura de portas ao público farase ás 20:00 horas.

O álbum de Unto Vello, xa dispoñible en plataformas dixitais, recompila cantares tradicionais recollidos por todo o país nun intenso labor de investigación e reinterpretación do patrimonio inmaterial galego. É a estrea discográfica do dúo formado por Bieito Pereira e Xabi Gómez, que conta coa produción de Hevi e a colaboración dos Pandeireteiros do Fiadeiro, Saínza Piñeiro, Lina e Lola e Julia e Luz Divina.

Un proxecto que nace das recollidas de música tradicional galega que fan os seus integrantes. O resultado é un espectáculo dedicado ao baile que tece comunidade en cada actuación.

 PUBLICIDADE

Se queres obter máis información do evento preme na imaxe.

No seu ano de traxectoria, o dúo recibiu nomeamentos a premios como os Youtubeiras 2025 e os Martín Códax na categoría de música tradicional e ofreceu máis de 25 concertos en lugares como a Sala Capitol onde agotou todas as entradas.

 PUBLICIDADE

Preme para obter máis información.

O concelleiro de Cultura, José Luís García, convida ao público “a asistir a este importante concerto que visibiliza o legado patrimonial e cultural da nosa terra, así como a gran proxección deste dúo do que Arzúa se sinte especialmente orgrullosa por contar con Bieito Pereira, que desde Brandeso leva anos realizando un destacado labor a favor do coñecemento e promoción da tradición oral e musical galega”.