A parella dezá tivo que abandonar a proba cando ocupaba o 4º posto da clasificación xeral
Laura Moure/Deza
A comarca do Carballiño acolleu a sexta proba do Campionato Galego de Rallyes 2022. A bordo do Peugeot 208 N5 do equipo ArVidal, a parella dezá formada por Javier Ramos e Álex Moure presentábase á cita ourensá coa premisa de manter un bo ritmo de carreira que lles permitise loitar por postos cabeceiros da Copa N5.
O rallye comezaba o venres pola tarde coa celebración da especial de “A Saleta”, un treito no que Ramos-Moure se situaban en posicións de pódium da Copa N5 e sendo 6º da Xeral.
Xa o sábado, xornada na que se celebraba o groso da proba, a parella dezá saía moi concentrada dende os primeiros intres, logrando uns tempos que lle permitían situarse a escasos dous segundos do pódium.
Avaría e abandono
Na segunda pasada polo treito de “O Irixo-Boborás”, un problema mecánico na transmisión do Peugeot 208 N5, provocou unha perda duns 30 segundos que finalmente conlevaría o abandono do Disiclin Racing.
Para Javier Ramos foi "unha mágoa que non puidésemos reparar e seguir en carreira xa que os tempos estaban saíndo ben cun ritmo constante. Estabamos nunha bonita loita tanto na Top Ten B como de cara á clasificación Xeral con rivais que están a un gran nivel, pero a mecánica desta volta non nos acompañou.”
Próxima parada, 10º Rallye Ribeira Sacra
Se non hai contratempos, Ramos-Moure participarán de novo a bordo do Peugeot 208 N5 no vindeiro Rallye Ribeira Sacra, que se celebrará os días 16 e 17 de setembro la localidade Ourensá de Luíntra.
Comments