Un condutor faleceu tras saírse da vía e chocar contra unha árbore na Baña

Ecos da Comarca/Xeral

Nas últimas horas produciuse un sinistro mortal en Galicia. O accidente tivo lugar no lugar de Barro de Abaixo, na parroquia do Barro. Minutos despois da medianoite, o 112 Galicia recibiu un aviso automático a través do sistema de emerxencia E-Call instalado no coche sinistrado.

O coche accidentado. Autor: Consorcio Contra Incendios e de Salvamento A Coruña

Os xestores do Centro Integrado de Atención ás Emerxencias tentaron contactar coa persoa que viaxaba no interior do vehículo, pero non obtiveron resposta.

Ante a situación, activouse un operativo no que participaron Urxencias Sanitarias de Galicia-061, os Bombeiros de Santa Comba, a Garda Civil de Tráfico e axentes da Policía Nacional. Tamén se informou ao Grupo de Intervención Psicolóxica en Catástrofes e Emerxencias (GIPCE), do Colexio Oficial de Psicoloxía de Galicia, por se resultara necesaria a súa colaboración.

Publicidade

Preme na imaxe se queres contactar connosco.

Cando os equipos de emerxencia chegaron ao lugar, confirmaron que un turismo con único ocupante saíra da vía e colidira contra unha árbore. Os profesionais sanitarios, mobilizados en ambulancia, só puideron confirmar o falecemento da persoa. Pola súa parte, os bombeiros encargáronse das tarefas de limpeza da vía.