Silleda pecha 2025 con superávit, máis de 1 millón de remanente e mellora a súa posición económica

Presentará ao pleno ordinario do vindeiro venres 27 un plan económico para garantir o cumprimento da regra de gasto derivado do préstamo para a reparación de pistas

Laura Moure/Silleda

O Concello de Silleda pechou o exercicio 2025 cun superávit de 425.931,80 euros e un remanente de tesourería para gastos xerais de 1.008.048,68 euros, segundo a liquidación do orzamento da que se dará conta no próximo pleno da corporación. Os datos supoñen unha mellora significativa respecto ao exercicio anterior. En 2024, o remanente situárase en pouco máis de 113.000 euros, polo que o Concello multiplica por nove a súa capacidade de aforro, ao regularizar o desfase nos prazos de pagamento por parte doutras administracións.

Segundo a alcaldesa e responsable de Facenda, Paula Fernández Pena, este incremento débese en boa medida á recuperación de ingresos pendentes doutras administracións, que se materializaron ao longo do exercicio. “Eses ingresos finalmente producíronse, reforzando a situación económica do Concello”, sinala.

Precisamente estes ingresos permiten, tal e como se recolle na liquidación, que o Concello cumpra co principio de estabilidade orzamentaria, ao rexistrar ingresos suficientes para financiar os gastos, mantendo ademais unha situación de liquidez que lle permite atender as súas obrigas e continuar coa execución de investimentos.

A alcaldesa destaca que “a liquidación confirma unha situación de estabilidade, con capacidade económica e sen problemas estruturais nas contas municipais”. A pesar destes datos positivos, o Concello deberá aprobar un Plan Económico Financeiro ao rexistrarse un incumprimento da regra de gasto, unha obriga establecida pola normativa estatal.

 Publicidade

Preme para obter máis información.

Desde o executivo local indícase que este incumprimento ten carácter puntual e está vinculado, principalmente, ao préstamo de 1,75 millóns de euros aprobado pola corporación para a execución do plan de mellora de pistas municipais 2025.

Debido aos atrasos burocráticos na contratacións —como a obtención de informes sectoriais— e as inclemencias do tempo, mais do 50% do importe do crédito non se puido executarse no pasado exercicio, o que provoca que no ano 2026 o gasto aumente respecto ao 2025, e en consecuencia, se supere a regra de gasto, unha norma que limita o incremento do gasto dun exercicio a outro.

“Debido a atrasos administrativos e tamén ao mal tempo, máis da metade das obras non se puideron facer o ano pasado e vanse executar neste ano. Isto fai que en 2026 se gaste bastante máis ca en 2025 e, por iso, se supere a regra de gasto, que basicamente limita que un Concello poida gastar moito máis dun ano para outro”, explica a alcaldesa.

"Cómpre salientar o carácter excepcional desta situación, xa que non é habitual cumprir co principio de estabilidade orzamentaria cando non se cumpre a regra de gasto, ao tratarse de magnitudes que adoitan evolucionar de maneira paralela. Por iso, o feito de que o Concello de Silleda presente superávit e remanente positivo a pesar deste incumprimento puntual evidencia que estamos ante unha situación excepcional, puntual e plenamente subsanable. O normal é que, cando se supera esa regra, tamén haxa problemas nas contas. Neste caso non é así: o Concello ten superávit e remanente, polo que estamos ante unha situación puntual que se vai corrixir”, engade Fernández Pena

O Plan Económico Financeiro que se levará a pleno responde, pois, a unha esixencia legal e, segundo a alcaldesa, “non implicará recortes nin cambios nos servizos”.

 PUBLICIDADE

Preme na imaxe para contactar con nós!

O documento será sometido a aprobación no pleno e posteriormente remitido ás administracións competentes, en cumprimento das obrigas de control e estabilidade orzamentaria. “Fomos capaces de manter o equilibrio das contas ao tempo que

executabamos investimentos relevantes, algo que non é doado e que demostra

que detrás destes datos hai planificación, control e responsabilidade na xestión

dos recursos públicos”, engade.

En canto ao destino do remanente, o goberno local lembra que, tal e como se acordou no momento da aprobación por unanimidade da operación de crédito, unha parte importante —500.000 euros— destinarase á amortización dos préstamos, priorizando así a redución da débeda municipal.

O resto do remanente non se incorporará a novo gasto, co obxectivo de mellorar o cumprimento da regra de gasto e reforzar a posición financeira do Concello. Neste sentido, desde o goberno local indícase que “con este plan sabemos que imos superar esta situación excepcional nun ano, pero queremos adoptar medidas que nos permitan facelo con marxe e con seguridade”.