Seis persoas resultan feridas, cinco delas excarceradas, nun accidente entre dous vehículos

Ecos da Comarca/Xeral

Seis persoas resultaron feridas, dúas delas de gravidade, despois de producirse unha colisión entre dous vehículos no termo municipal de Carballo.

O 112 Galicia tivo constancia do accidente arredor das 20:00 horas, a través do aviso dun smartphone que alertaba de que o seu propietario sufrira un sinistro. Minutos despois, un particular contactou co servizo de emerxencias para informar dun choque grave entre dous coches na estrada AC-418, entre os puntos quilométricos 2 e 3, á altura de Goiáns. Na súa chamada, indicaba a gravidade do accidente e a posibilidade de que houbera persoas atrapadas.

De inmediato, desde o 112 Galicia activouse un operativo no que participaron o Servizo de Urxencias Sanitarias de Galicia-061, os Bombeiros de Carballo, o GES de Ponteceso, axentes da Garda Civil de Tráfico e da Policía Local, ademais dos efectivos de Protección Civil.

Publicidade

Preme na imaxe se quere contactar connosco.

Unha vez no punto, os equipos de intervención confirmaron que foi necesario empregar o material de excarceración para liberar a cinco persoas: dúas dun dos vehículos e tres do outro. No total, seis persoas tiveron que ser trasladadas ao hospital de referencia para recibir atención médica, dúas delas en estado grave.