Os Bombeiros tiveron que sacar a un condutor polo maleteiro tras quedar atrapado

Ecos da Comarca/Xeral

Os Bombeiros da Coruña tiveron que sacar a un condutor polo maleteiro tras quedar atrapado, tal e como informa o 112 Galicia. O vehículo no que viaxaba bateu contra un camión de transporte de coches.

O sinistro rexistrouse pasadas as once desta mañá en Alfonso Molina, en sentido saída da cidade. Varios condutores contactaron co 112 Galicia para informar do accidente aínda sen quedar clara a secuencia do choque. 

Co paso dos minutos, confirmouse que un camión de transporte de vehículo e un turismo colisionaron e, como consecuencia do impacto, o condutor do coche quedou atrapado. De feito, foi axudado polos bombeiros para saír do turismo a través do maleteiro.

Publicidade

Preme na imaxe para obter máis información do evento.

Unha vez fóra, atendérono os profesionais de Urxencias Sanitarias de Galicia-061, que confirmaron que se trataba do único ferido neste accidente.

Ademais de bombeiros e sanitarios, foron avisados os axentes da Policía Local e os recursos de limpeza e mantemento da vía.

Publicidade

Preme na imaxe se quere contactar connosco.

Un coche que daba bandazos

Por outra banda, en Santiago, concretamente na saída 72 da AP-9, en sentido norte, tivo lugar outro accidente con tres coches implicados e unha persoa ferida.

Segundo a información que facilitaron ao 112 Galicia os diversos alertadores, tratouse dun vehículo que invadía os outros carrís e ocasionou danos a outros coches. En total, foron tres os turismos implicados e unha persoa que foi atendida por Urxencias Sanitarias de Galicia-061.