"Diálogo, entendemento e consenso son necesarios para que Monterroso teña futuro", sinala
PLENO DE INVESTIDURA. ELECCIÓNS MUNICIPAIS 2023
Laura Moure/Monterroso
Onte, sábado, tamén tivo lugar o pleno de constitución da nova Corporación Municipal de Monterroso. A sesión estivo marcada polas incógnitas, xa que visto os resultados electorais do 28M, non había nada claro. Finalmente, saíu elexido mandatario o popular Eloy Pérez, que dende o 2021 era tenente de alcalde no goberno liderado por Rocío Seijas, de Independentes por Monterroso.
Cabe recordar que os resultados foron os seguintes:
PP ( 3 concelleiros)
PSOE ( 3 concelleiros)
Independientes por Monterroso ( 2 concelleiros)
Partido Galego (2 concelleiros)
BNG (1 concelleiro)
Á hora de votar, as cinco formacións políticas, fixérono por cada un dos seus candidatos, saíndo elixido Pérez, que logrou os tres votos do seu partido, pero que conseguiu o bastón por ser a forza máis votada nos comicios.
Así terá que gobernar en minoría, aínda que sinalou que manterá encontros con Independientes por Monterroso e co Partido Galego para conseguir un acordo.
"Diálogo, entendemento e consenso son necesarios para que Monterroso teña futuro. É necesario que todos axudemos a construilo e non a destruilo. O futuro está nas mans dos políticos e é a nosa responsabilidade. Sorte a todos os integrantes da corporación municipal. Aut viam inveniam aut faciam", sinala o novo mandatario.
NOTICIAS RELACIONADAS:
