O Pino recupera a súa media maratón coa celebración da carreira Os 21 do Galo Piñeiro
Será o o 2 de agosto
Laura Moure/O Pino
O alcalde do Pino, Manuel Taboada, e o presidente da Federación Galega de Atletismo, Iván Sanmartín, presentaron este xoves 17 de xullo a primeira edición da carrera Os 21 do Galo Piñeiro, proba que se desenvolverá o sábado 2 de agosto e que contará con catro distancias diferentes para que poidan participar atletas de todas as idades. Unha media maratón (21 quilómetros) e unha carreira de 8 quilómetros, que seguirán o itinerario do Camiño Francés, son as propostas para as persoas adultas.
Publicidade
A proba, organizada en colaboración coa Sociedade Deportiva Compostela-Tambre Lengüelle, seguirá o trazado do Camiño Francés e, tal e como lembrou o alcalde na presentación, “dálle continuidade á media maratón que xa se celebraba antano entre Arzúa e O Pino, tendo como escenario as fermosas paisaxes do Camiño de Santiago”.
Ivan Sanmartín refrendou as palabras de Manuel Taboada ao recordar a súa etapa como
técnico de Deportes no Pino e a organización da devandita media maratón. Destacou así
mesmo o privilexio que supón correr polo Camiño xunto a tantos peregrinos: “É un auténtico pracer compartir esta ruta nun ambiente tan especial”, sinalou.
Publicidade
A media maratón dos 21 do Galo Piñeiro sairá da capela da Madalena de Arzúa ás 19:30 horas, mentres que as persoas participantes na proba de 8 quilómetros tomarán a saída ás
19:50 horas dende o restaurante A’Esquipa. A meta estará situada a carón do Concello do
Pino.
Nos arredores da meta desenvolveranse as dúas probas para a rapazada: un circuíto de 3 quilómetros para mozas e mozos de entre 13 e 15 anos, que partirá ás 19:30 horas; e outro
de 1,5 quilómetros para participantes de entre 10 e 12 anos, que comezará ás 19:45 horas.
Recuperar a media maratón do Pino coincidindo coa celebración da Festa do Galo Piñeiro ofrece unha forma diferente de coñecer o Camiño de Santiago, combinando deporte, patrimonio e gastronomía nunha experiencia lúdica e accesible. Ademais, permitirá
compartir o percorrido con peregrinos de todas as partes do mundo en pleno camiño, o que lle engade valor e autenticidade á vivencia.
Na presentación dos 21 do Galo Piñeiro, que tivo lugar no Casa Consistorial do Pino, participaron tamén o concelleiro de Deportes do Concello do Pino, Borja Castro; e o responsable de seguridade viaria da proba, Antonio Riveira. O primeiro subliñou a importancia de fomentar o deporte dende idades temperás, ofrecendo actividades que
animen aos máis cativos a gozar do exercicio físico e da natureza. Pola súa parte, Riveira quixo agradecer expresamente “a implicación de todos os efectivos que fan posible a
carreira, dende os voluntarios ata o persoal dos concellos participantes”.
As inscricións están abertas ata o 30 de xullo en www.carreirasgalegas.com , onde tamén se pode ver o regulamento da proba.
Comentarios