O piloto palense Luis Vilariño correrá con Enrique Velasco no Rally Sur do Condado

Envía unha mensaxe de forza a Álvaro Muñiz e a Néstor Casal, tras o grave accidente da pasada fin de semana

Ecos da Comarca/Palas de Rei

Chega unha das citas máis duras, calorosas e esixentes do calendario autonómico: o Rally Sur do Condado que se disputa este sábado 11 de xullo. Tras o prematuro abandono en Pontevedra, o Vilariño Team acode a esta quinta proba do ano coas ganas renovadas, o Skoda Fabia R5 Evo revisado a conciencia, "e decididos a pelexar de ti a ti cos equipos de cabeza".

A preparación desta carreira veu marcada polos acontecementos da pasada fin de semana, que obrigaron a reestruturar os plans do equipo. Aínda que inicialmente estaba previsto que Néstor Casal se sentase á dereita, finalmente será Enrique Velasco quen asuma os labores de copilotaxe nesta esixente cita.

 PUBLICIDADE

Preme na imaxe para obter máis información deste evento.

Antes de afrontar o estritamente deportivo, o piloto palense Luis Vilariño quixo enviar unha mensaxe de forza moi especial: "Esta foi unha semana difícil para todos os que formamos parte deste deporte. Quero mandar todo o meu apoio e un abrazo enorme a Álvaro Muñiz e a Néstor Casal, que son grandes amigos e mellores compañeiros deste deporte. En momentos así, as carreiras pasan a un segundo plano, e o único que importa é que se recuperen o mellor e máis rápido posible. Correremos esta fin de semana pensando neles".

 PUBLICIDADE

Preme na imaxe para obter máis información do evento.

No tocante ao rali, as estradas do sur da provincia de Pontevedra poñerán a proba a resistencia das mecánicas e dos equipos debido ás altas temperaturas habituais da zona. Luis Vilariño destaca que "o Sur do Condado sempre é un rali de supervivencia, moi longo, técnico e onde a calor xoga un papel fundamental. Tras o descarte da última proba, non podemos permitirnos máis fallos se queremos manternos na pomada do campionato. Imos saír a por todas desde o primeiro tramo do sábado para intentar brindar un bo resultado aos nosos patrocinadores e a toda a afección que se desprace aos tramos".

 PUBLICIDADE

Preme na imaxe para obter máis información deste evento.

Cabe mencionar que Vilariño ocupa o terceiro posto na clasificación do Campionato Galego de Ralis.