O piloto palense Luis Vilariño abandona en Pontevedra e xa pensa na próxima cita

Unha pinchazo o sábado e unha penalización o venres deixaron ao equipo sen opcións de pelexar por un bo resultado no campionato

Ecos da Comarca/Palas de Rei

O Rali de Pontevedra non se desenvolveu segundo os plans previstos para o Vilariño Team. Tras un inicio de tempada impecable encadeando tres podios consecutivos, o piloto palense Luis Vilariño e o seu equipo víronse obrigados a abandonar antes de tempo na cita pontevedresa, optando por descartar a proba ante a imposibilidade de pelexar polos postos de honra.

A fin de semana xa se complicara na xornada do venres debido a unha penalización que atrasaba ao equipo na clasificación xeral. Con todo por recuperar para a etapa do sábado, a mala fortuna volveu aliñarse coa estrutura de Palas de Rei no primeiro tramo da mañá, onde unha inoportuna picada terminou por dinamitar calquera opción matemática de remontada.

Ante unha desvantaxe insalvable que impedía loitar por un resultado que sumase para a clasificación xeral do certame, Luis Vilariño tomou a decisión de deterse, conservar a mecánica do Skoda Fabia R5 Evo e evitar riscos innecesarios.

 PUBLICIDADE

Preme para obter máis información.

Luis Vilariño: "Foi unha fin de semana para esquecer no deportivo, pero as carreiras ás veces son así. A penalización do venres obrigábanos a saír ao ataque o sábado, pero a picada no primeiro tramo quitounos de golpe calquera opción de pelexar por algo importante. Nese momento, co rali condicionado por completo, decidimos que o máis sensato era parar. Non tiña sentido seguir correndo e arriscando o coche cando xa non había posibilidade de sumar un bo resultado para o campionato. Agora toca restablecer, analizar os erros e centrar desde xa todos os nosos esforzos na preparación da seguinte cita do calendario. Queremos volver estar arriba e seguir pelexando polo certame coas máximas garantías".

 PUBLICIDADE

Preme na imaxe e contacta con nós!

A pesar deste contratempo, o piloto da Ulloa mantén unha posición sólida na zona alta do Campionato Galego de Ralis grazas á renda de puntos sumada nas tres primeiras carreiras do ano. A estrutura xa traballa a pleno rendemento coa vista posta na próxima parada do certame autonómico.