O palense Luis Vilariño e David Míguez asinan unha vitoria incontestable no Rallysprint de Castropol

Laura Moure/Palas de Rei

Regreso triunfal ás carreiras para o Vilariño Team. Luis Vilariño e David Míguez completaron unha actuación impecable esta fin de semana no Rallysprint de Castropol, adxudicándose a vitoria absoluta tras marcar o scratch en cada unha das tres pasadas ao tramo cronometrado.

Trátase da segunda ocasión na que o piloto palense sobe todo o máis alto do podio nesta emblemática proba asturiana. Desde os primeiros metros, a dupla demostrou un ritmo endiañado ao volante do Skoda Fabia R5 Evo, aproveitando os máis de 30 quilómetros de competición para afinar axustes e certificar as excelentes sensacións do vehículo tras o parón estival.

 PUBLICIDADE

Preme na imaxe para obter máis información do evento.

Este triunfo supón o espaldarazo definitivo de moral e ritmo de carreira para o seu próximo compromiso: o Rallye San Froilán, cita de casa do Campionato Galego que se disputará a próxima fin de semana e onde o equipo acudirá coa máxima motivación para pelexar polos postos de honra.

 PUBLICIDADE

Preme na imaxe para obter máis información.

"Non podiamos pedir un regreso mellor tras o descanso estival. O coche funcionou á perfección durante todo o día e con David nas notas tivemos unhas sensacións altísimas desde o primeiro tramo. Gañar en Castropol por segunda vez é unha alegría enorme, pero sobre todo quedámonos co ritmo e a confianza que recuperamos. Serviranos como un impulso magnífico para chegar ao 100% ao Rallye San Froilán desta próxima fin de semana, unha proba moi especial onde sairemos a por todas ante a nosa afección", destaca Luis Vilariño.