O Open Internacional de Petanca Mixto “Suso Otero” volta este sábado á Bandeira con 250 participantes

A cita deportiva, que se disputará novamente na rúa Maceira Boa, acada a súa sétima edición ca participación de máis de 50 equipos

Laura Moure/Silleda

A petanca volve ser protagonista esta fin de semana no municipio de Silleda. Así, este sábado día 30, a vila da Bandeira será o escenario do VII Open Internacional de Petanca Mixto Suso Otero, un evento deportivo que honra a figura de Suso Otero, antigo presidente do Club de Petanca Bandeira quen foi unha peza fundamental no crecemento deste deporte na comarca.

O torneo, que se celebraba tradicionalmente o domingo das festas locais, cambia de data novamente para mellorar a organización e planificación. A competición desenvolverase por terceiro ano consecutivo na rúa Maceira Boa, xunto ao edificio Parchís e próximo ao CEIP Ramón de Valenzuela, nun terreo cedido por un particular e acondicionado pola colaboración entre os membros do club e o Concello de Silleda.

A cita, que acada a súa sétima edición, foi presentada onte na praza Juan Salgueiro da vila, ca presenza de membros do club, que preside Xosé Casal, a alcaldesa, Paula Fernández, e a concelleira de Deportes, Mónica González. As partidas das 3 finais das categorías Principal, Principal “B” e Consolación “A” xogaranse nas canchas do club, xunto á praza, a partires das 20:00 horas.

Por segundo ano consecutivo, o Campionato está dentro do Circuíto Petanca España, na categoría Top* 1, sendo un dos 20 torneos autorizados que conforman este circuíto organizado pola Federación Española de Petanca neste ano 2025.

 Publicidade

Preme na imaxe para obter máis información.

Participarán entre 50 e 64 equipos, preto de 250 xogadores/as (todos/as con licenza federativa) de Galicia, Aragón, Asturias, Cantabria, Castela e León, Cataluña, País Vasco e Valencia ademais dalgunha licenza francesa. Da comarca do Deza ademais dos equipos de Bandeira participarán tamén varios equipos de Lalín.

En total repartiranse 2.865 euros en premios. Doce dos equipos participantes obterán premios en metálico e 4 serán agasallados con produtos locais. Os/as 48 xogadores/as que cheguen ás semifinais do Torneo nas distintas categorías recibirán ademais un trofeo individual. Como novidade, este ano todos os equipos serán agasallados cun “Boliche” e un “Metro” cos logos do club no momento da súa acreditación.

Os horarios do campionato serán de 9:30 a 14 horas e de 16 a 21 horas. A arbitraxe e a mesa de control estará a cargo do Comité Nacional de árbitros e da Federación Galega de Petanca.

Publicidade

Preme na imaxe se queres contactar connosco.

O Club Petanca Bandeira, organizador do campionato, participou nesta temporada 2025 na Liga Xunta de Galicia, organizada pola Federación Galega de Petanca, en dúas categorías: División de Honra e Liga Norte, cun total de 30 xogadores/as.

Durante a presentación, a alcaldesa, Paula Fernández destacou o traballo e esforzo da entidade “que con 47 anos de historia situou a esta localidade tamén no mapa con esta modalidade deportiva”, engadiu.