O IES Marco do Camballón concentrarase todos os martes para reclamar profesorado de Latín e Grego

Laura Moure/Vila de Cruces

O alumnado e profesrado de 2º de Bacharelato do IES Marco do Camballón de Vila de Cruces concentrouse este martes diante do instituto para reclamar a incorporación de profesorado de Latín e Grego. A protesta forma parte dunha serie de mobilizacións que, segundo anunciou a comunidade educativa, se repetirán todos os martes ata conseguir unha solución.

Baixo o lema «En defensa do Bacharelato nas Cruces. Profe de Latín e Grego xa!», o alumnado reclama á Xunta de Galicia que garanta a impartición presencial destas materias, que actualmente deben cursar a distancia ante a falta de docente especialista no centro.

As estudantes afectadas consideran que a alternativa ofrecida non garante unhas condicións de aprendizaxe equitativas, xa que deben seguir as clases en liña e desprazarse ata Santiago de Compostela para realizar os exames. "Non contamos cun profesor ou profesora de Latín e Grego para poder cursar estas materias de forma presencial", explica Sarai Varela, unha das alumnas afectadas, que considera que esta situación supón unha desvantaxe para quen escolleu a modalidade de Humanidades.

As familias tamén amosan a súa preocupación pola falta de solucións. Begoña Louzao, nai dunha das estudantes, asegura que o curso comezou coa praza de Latín e Grego nas listas de substitucións, pero que non se enviou ningún docente para impartir as materias. "As rapazas séntense moi perdidas e nós sentimos que están xogando co seu futuro", afirma.

Pola súa banda, Cintia Mato, outra das alumnas, recoñece sentirse desamparada ante unha situación que, segundo denuncia, dificulta o seguimento do curso. As familias e o alumnado tamén cuestionan o funcionamento das aulas en liña, ao considerar que non permiten resolver as dúbidas nin recibir as explicacións necesarias.

Medo polo futuro do Bacharelato

A reivindicación vai máis alá da incorporación dun docente. Mari Carmen Silva, presidenta da ANPA, advirte do temor a que a falta de presencialidade destas materias sexa o primeiro paso cara á desaparición do Bacharelato no municipio. Por iso, chama a veciñanza a sumarse ás mobilizacións para defender a educación pública no rural.

O IES Marco do Camballón conta con preto de 180 alumnos e alumnas que cursan ESO, Bacharelato e os ciclos formativos de Soldadura e Caldeiraría e de Atención a Persoas en Situación de Dependencia. Vila de Cruces, cunha poboación aproximada de 4.900 habitantes, perdeu case a metade do alumnado do centro nos últimos vinte anos, segundo os datos achegados pola comunidade educativa.

 PUBLICIDADE

Preme na imaxe para obter máis información.

Neste contexto, alumnado, familias, profesorado e outros axentes sociais están a celebrar asembleas semanais para coordinar as accións de protesta. O seu obxectivo prioritario é recuperar as clases presenciais de Latín e Grego e defender a calidade do ensino no municipio.

Un problema que afecta outros centros galegos

A situación do IES Marco do Camballón enmárcase nunha problemática máis ampla relacionada coa docencia das linguas clásicas en Galicia. A plataforma Clásicas en Pé reclamou recentemente que se garanta o ensino presencial destas materias para o alumnado que carece de profesorado especialista.

Segundo os datos trasladados pola plataforma, hai estudantes que seguen as clases a distancia malia existir profesorado de Latín ou Grego contratado a xornada completa noutros centros. O colectivo pide recuperar a presencialidade nos institutos afectados e garantir a docencia tamén nas comarcas rurais mediante fórmulas como as medias xornadas ou as itinerancias coordinadas. “Descubrimos que en 47 institutos da Galiza hai alumnado que recibe clases a distancia malia ter profesores de clásicas contratados a xornada completa”, lamenta Adelia Troncoso, portavoz da Plataforma.

 PUBLICIDADE

Preme na imaxe para contactar connosco.

Para o alumnado do Camballón, a reivindicación é tamén unha defensa do dereito a elixir os seus estudos sen ter que renunciar a oportunidades polo feito de vivir nun concello rural. "Queremos que cada quen escolla o que queira estudar. Queremos un mestre de Latín e Grego e ter todas as oportunidades que ten toda a xente da nosa idade na Galiza", reivindican as estudantes de segundo de Bacharelato, que aseguran que continuarán mobilizándose para defender o seu centro e as xeracións que veñan detrás. Esta experiencia está a ser unha lección sobre a realidade social no Camballón". Segundo unha das alumnas de 2º de Bacharelato, “esta situación evidencia a hipocresía dalgunha das nosas institucións xa que, se tanto lles preocupa o despoboamento do rural, como é que están a aplicar medidas que o perxudican?”

Como explica Sarai Varela “todo custa traballo, hai que esforzarse. No noso centro queremos médicas, cociñeiros, agricultores… Queremos poetas, xornalistas, actores…. Queremos que cada quen escolla o que queira estudar. Queremos un mestre de Latín e Grego e ter todas as oportunidades que ten toda a xente da nosa idade na Galiza. Porque este é o noso centro e temos que loitar por el".