O galego suma voces: éxito de participación no curso AcolleGalego de Arzúa

Desenvólvese nas instalacións da aula CeMIT de Arzúa e contou cunha alta participación

Laura Moure/Arzúa

O Concello de Arzúa vén de poñer en marcha esta semana o curso de introdución á lingua e á cultura galegas, unha iniciativa enmarcada no programa AcolleGalego, co obxectivo de achegar a lingua galega a persoas procedentes doutras comunidades lingüísticas. O curso desenvólvese nas instalacións da aula CeMIT de Arzúa e contou cunha alta participación, o que demostra o interese crecente pola aprendizaxe do galego como ferramenta de integración, convivencia e enriquecemento persoal.

As sesións inclúen contidos básicos de lingua, expresión oral e escrita, así como unha introdución á cultura galega, cun enfoque didáctico, práctico e accesible para todas as persoas participantes.

 PUBLICIDADE

Preme na imaxe para obter máis información do evento.

A concelleira de Normalización Lingüística, Lucía López, destacou que “os bos datos de participación neste curso son unha mostra de que existe interese por coñecer o galego cando se crean espazos accesibles e próximos. Galiza ten unha lingua propia, unha realidade moitas veces descoñecida para quen chega ao noso país. Se queremos integrar de verdade, cómpre ensinar o galego e implicar ás persoas que veñen doutras comunidades lingüísticas no seu coñecemento e uso cotián, porque é un dereito e tamén unha responsabilidade compartida, xa que só deste xeito poderán participar plenamente da nosa cultura e da vida do país que as acolle. O galego é lingua de acollemento, porque nos une e nos fai sentir parte dun mesmo pobo. Agardamos que moitas máis persoas se acollan ao galego.”

PUBLICIDADE

Preme na imaxe se queres contactar connosco.

Con esta proposta, o Concello de Arzúa reafirma o seu compromiso coa promoción da lingua galega e coa integración sociocultural a través de proxectos formativos inclusivos e participativos.