O galego Brais Revaldería estrea en América a súa experiencia inmersiva sobre a Rapa das Bestas
- ecosdacomarca
- hace 2 horas
- 2 Min. de lectura
Ecos da Comarca/Xeral
O cineasta lucense Brais Revaldería presentará en América Fillos do Vento: A Rapa, unha experiencia inmersiva arredor da Rapa das Bestas de Sabucedo (A Estrada, Pontevedra), que celebrará a súa estrea norteamericana no festival South by Southwest (SXSW) 2026, en Austin (Texas).
A obra foi seleccionada dentro da categoría oficial XR Experience Spotlight e exhibirase do 15 ao 17 de marzo no Fairmont Hotel, consolidando así a súa proxección internacional tras o seu paso por Cannes e Sevilla.
O salto a América tras Cannes e Sevilla
O proxecto foi un dos tres nomeados en Cannes dentro da súa categoría. A súa estrea internacional tivo lugar no Marché du Film do Festival de Cannes 2025, e posteriormente celebrou a súa presentación en España no Festival de Cine Europeo de Sevilla.
Coa súa presenza en SXSW, unha das grandes citas mundiais para a innovación audiovisual e as narrativas inmersivas, Fillos do Vento: A Rapa dá un novo paso na súa internacionalización.
Publicidade
Sete anos na Rapa das Bestas
Dirixida por Revaldería, gañador de dous premios Emmy polas súas colaboracións con HBO en producións como Westworld e Game of Thrones, a obra é o resultado de sete anos de rodaxe consecutivo nas montañas de Sabucedo, onde cada verán se celebra unha das tradicións máis singulares de Europa.
A Rapa das Bestas de Sabucedo, con máis de 500 anos de historia documentada e recoñecida como Festa de Interese Turístico Internacional, é un rito comunitario único: os veciños baixan os cabalos salvaxes do monte ata o curro para marcalos, desparasitalos e cortarlles as crinas, nun pacto ancestral entre comunidade e natureza que continúa vivo xeración tras xeración.
PUBLICIDADE
Con esta proposta, o creador galego leva ao público internacional unha mirada inmersiva sobre unha das expresións culturais máis emblemáticas de Galicia, combinando tecnoloxía e tradición nun relato sensorial que afonda na identidade, o territorio e a memoria colectiva.
NOTICIAS RELACIONADAS:
O lucense Brais Revaldería presenta en España a experiencia cinematográfica ‘Fillos do Vento: A RAPA’: https://www.ecosdacomarca.com/post/o-lucense-brais-revalder%C3%ADa-presenta-en-espa%C3%B1a-a-experiencia-cinematogr%C3%A1fica-fillos-do-vento-a-rapa
O lucense Brais Revaldería presentou en Sevilla o seu proxecto cinematográfico sobre a Rapa de Sabucedo: https://www.ecosdacomarca.com/post/o-lucense-brais-revalder%C3%ADa-presentou-en-sevilla-o-seu-proxecto-cinematogr%C3%A1fico-sobre-a-rapa-de-sabuc
Comentarios