O Entroido de Arzúa arrancará o 12 e inclúe cinco días de actividades variadas
A programación está composta por un obradoiro de iniciación á batucada, un concurso de disfraces, música, contacontos, inchables e un espectáculo circense
Laura Moure/Arzúa
O Departamento de Cultura do Concello de Arzúa organiza para o Entroido cinco días de actividades que darán comezo o sábado 12 e incluirá distintas actividades: un obradoiro de iniciación á batucada, un concurso de disfraces, música, contacontos, inchables e un espectáculo circense.
Así arranca o día 12 cun obradoiro de iniciación á batucada. Esta actividade formativa de percusión para nenas, nenos, mozas e mozos é totalmente de balde e celebrarase no primeiro andar do Multiusos Terra do Queixo ás 17:00 para nenas e nenos de 8 a 14 anos e ás 18:30 para persoas de 15 anos en diante. As prazas son limitadas e as inscricións están
abertas no Departamento de Cultura ou chamando ao 981 500 222.
O domingo 20, como xa se anunciara, Arzúa acollerá desde as cinco da tarde o Concurso de Disfraces no Multiusos Terra do Queixo onde se desenvolverán as actuacións dos participantes e se fará a entrega dos premios que superan os dous mil euros repartidos entre as categorías de comparsas, grupos, individual infantil e individual adulto.
Como novidade, para dar debido cumprimento das medidas sanitarias, o concurso celebrarase co público sentado e cos concursantes facendo a súa intervención sobre escenario nunha gala que estará presentada polo humorista arzuán Xan Veiga. A apertura de portas farase unha hora antes do inicio.
As actividades continúan o domingo de Entroido, 27 de febreiro, co grupo de gaitas O Bringuelo que animará coa súa música as rúas da vila de doce a dúas do mediodía.
Na xornada do luns 28 terá lugar o contacontos musicado O son que me arroupa a cargo da Asociación Antonio Gandoy. Unha proposta teatral e musical para público infantil e familiar, que presenta as pezas do traxe tradicional feminino a través de fragmentos de cantigas tradicionais. A función terá lugar ás seis da tarde no primeiro andar do Multiusos Terra do Queixo.
A programación complétase na tarde do martes de Entroido, o día 1 de marzo, cunha festa de inchables en horario de 16:00 a 19:00 e, a continuación, levarase a cabo unha actuación para toda a familia a cargo de Circus Maginifucus cunha combinación de teatro, acrobacias, malabares, clown e moitas risas. Estas actividades realizaranse na Praza de Galiza ou, en caso de mal tempo, no Pavillón Polideportivo de O Viso.
NOTICIA RELACIONADA:
Comentarios