Ecos da Comarca/Monterroso
Delegados de CSIF, en representación dos centros penais de Bonxe, Monterroso e Pereiro de Aguiar mantiveron un encontro esta semana co director xeral de Execución e Reinserción Social para trasladarlle as queixas dos persoais pola nefasta política de clasificación de internos dos centros tipo C en Galicia e os graves problemas que está a xerar, cun preocupante incremento de agresións.
Os representantes sindicais, que levan tempo denunciando esta situación e reclamando ser escoitados polo director xeral, aproveitaron a reunión para que os responsables de institucións penais coñezan de primeira man os problemas que está a xerar a “érronea clasificación e destino de internos cun perfil inapropiado para estes centros”, así como as deficiencias arquitectónicas para albergar a esta tipoloxía de presos.
Publicidade
CSIF advirte que durante o ano 2023 producíronse agresións graves nos distintos centros tipo C de Galicia, como os que tiveron lugar en Bonxe, onde un funcionario chegou a perder o coñecemento e en Monterroso, no que outro funcionario recibiu un cabezazo no tabique nasal.
Ademais lembra que desde a firma do Acordo Marco para unha Administración do Século XXI, o pasado 1 de marzo de 2023, este tipo de centros deben albergar “…poboación con baixo perfil conflitivo, en réxime de semi-liberdade ou con aplicación de penas e medidas alternativas”, unha norma que claramente se está incumprindo, indicaron.
Publicidade
Para CSIF, urxe dar unha solución a esta “deficiente política de traslados” e que se adecúe ao que realmente recolle o acordo marco, polo que rexistraron un novo escrito coas súas demandas, que foi avaliado durante a reunión polo director xeral, “confiando en que tome cartas sobre o asunto e rectifíquese esta política o máis axiña posible”.
