O Concello de Vila de Cruces instala un cambiador de bebés no centro de saúde

Ademais avanza na humanización da área de Pediatría e asume outras mellores con fondos propios ante a falta de respostas da Xunta de Galicia

Laura Moure/Vila de Cruces

O Concello de Vila de Cruces vén de instalar un cambiador para bebés no aseo de Pediatría do Centro de Saúde. A instalación deste equipamento responde a unha necesidade detectada desde hai tempo e trasladada en varias ocasións á Xunta de Galicia, Administración competente en materia sanitaria. Xunto co cambiador, o Concello solicitou tamén outras actuacións, como a humanización da sala de espera de Pediatría, a habilitación dunha sala de lactancia, a dotación de novos equipamentos e a reparación das diversas deficiencias que presenta o edificio.

Ante a falta de resposta a estas demandas, o Concello decidiu asumir con fondos propios a adquisición e instalación do cambiador de bebés, co obxecto de ofrecer unha solución inmediata ás familias que acoden a diario ao Centro de Saúde.

 PUBLICIDADE

Preme na imaxe para obter máis información deste evento.

Ademais, o Concello continúa traballando na mellora da área de Pediatría. Neste sentido, xa foi encargado a unha carpintería local un moble a medida que permitirá acondicionar a sala de espera e crear un espazo máis acolledor. Igualmente, completarase con xogos e outros elementos pensados para contribuír á humanización dun servizo polo que pasan cada día numerosas crianzas.

 PUBLICIDADE

Preme na imaxe para obter máis información do evento.

Cómpre lembrar que todas estas actuacións foron previamente solicitadas á Xunta de Galicia desde o Concello cruceño. Representantes do Sergas visitaron o centro para coñecer de primeira man as necesidades existentes, pero, transcorrido o tempo, non se executou ningunha mellora. Ademais, o equipo de goberno vén de presentar, novamente, un escrito ante a Xunta para denunciar a situación que está a vivir o Centro de Saúde pola falta de cobertura das baixas de longa duración do persoal médico, unha circunstancia que está a repercutir na atención sanitaria que recibe a veciñanza e que tamén afecta ao persoal do centro, sobrecargado dende hai meses.

 PUBLICIDADE

Preme na imaxe para obter máis información do evento.

Desde o Concello considérase que os cidadáns de Vila de Cruces merecen unha sanidade pública de calidade, con recursos suficientes e unhas instalacións dignas. “Por iso, mentres continuamos reclamando á Xunta que cumpra coas súas competencias, seguiremos impulsando, dentro das posibilidades municipais, aquelas actuacións que permitan mellorar o benestar das familias e ofrecer uns espazos máis cómodos, seguros e acolledores”, segundo conclúe o alcalde, Luís Taboada.