O Concello de Silleda renova a iluminación do local da Asociación de Mulleres
O obxectivo da actuación é mellorar as condicións nas que se imparten os seus cursos
Laura Moure/Silleda
O local da Asociación de Mulleres de Silleda conta cunha nova iluminación que permitirá ás súas usuarias desenvolver as actividades en mellores condicións, especialmente aquelas que requiren maior precisión visual, como a costura, a calceta ou os bolillos. O Concello de Silleda atendeu así unha petición das integrantes da asociación, que trasladaran a necesidade de contar cunha maior intensidade de luz nos espazos nos que se imparten os cursos.
Os traballos consistiron na instalación de novas luminarias LED, que ademais de mellorar a calidade da iluminación permiten reducir o consumo eléctrico e avanzar na eficiencia enerxética do local.
PUBLICIDADE
Esta colaboración forma parte do apoio que o Concello presta ao tecido asociativo, contribuíndo ao mantemento e á mellora dos espazos nos que as entidades desenvolven a súa actividade diaria.
Un espazo para aprender e compartir
Máis alá dos cursos, a Asociación de Mulleres de Silleda ofrece un punto de encontro no que compartir afeccións, aprender novas habilidades e desfrutar da compañía doutras persoas. A entidade mantén unha programación semanal que inclúe bolillos os luns, costura os martes e xoves, e calceta e inglés os mércores.
PUBLICIDADE
Dende o Concello quérese recoñecer a implicación das mulleres que fan posible esta actividade e animar á veciñanza a achegarse á asociación e participar nas súas propostas, que contribúen a manter viva a actividade social e asociativa do municipio.
As persoas interesadas en recibir máis información sobre os cursos poden contactar coa asociación no teléfono 625 901 579.
Comentarios