As prazas son limitadas e o prazo para anotarse remata o 24 de abril
Laura Moure/Arzúa
A Concellaría de Igualdade do Concello de Arzúa, a través do seu Centro de Información ás Mulleres, organiza xunto a Fundación Mujeres un itinerario de emprego dirixido a mulleres desempregadas ou en procura de mellora laboral. O itinerario presencial de emprego, enmarcado no proxecto «Alicia, activando la igualdad», constaría de tres fases.
A primeira, «Quero», abordará temáticas de carácter máis persoal con talleres de autoestima, habilidades sociais, xestión do tempo e trasteando por internet (para adquirir destrezas básicas para o manexo de internet).
A segunda, «Podo», que sería a máis extensa e a centrada xa na parte laboral, consta dos seguintes contidos:
Condicións laborais: Neste taller analizaranse as condicións laborais requeridas polo mercado de traballo e se as participante poden adaptarse ás mesmas.
Competencias profesionais: Neste taller veranse as competencias profesionais que demanda o mercado laboral e se as participantes teñen ditas competencias.
Obxectivo profesional e autoemprego: Valoraranse as diferentes alternativas de inserción ao mundo laboral, por conta propia e por conta allea.
Publicidade
Habilidades sociolaborais no mercado de traballo: Aprenderán a potenciar as súas habilidades para mellorar a estratexia de busca de emprego.
Habilidades sociolaborais para a procura de emprego: Aprenderán a potenciar as habilidades que require o mercado de traballo.
Usando o meu ordenador para a busca de emprego (I e II): Aprenderán a utilizar o ordenador e Internet de xeito práctico e aplicado á actividade da busca activa de emprego.
Estratexias de busca de emprego en internet (I e II): Utilizarán ferramentas que nos proporciona internet para adquirir estratexias de busca activa e eficaz de emprego.
A última fase, «Consigo», sería xa máis orientada na práctica a, por exemplo, prepararse para unha entrevista de traballo, un proceso de selección de persoal, etc.
Esta é unha acción formativa en modalidade presencial, os xoves e venres do 2 de maio ao 7 de xuño de 2024 en horario de mañá, de 10:00 a 14:00 na Aula CeMIT do Concello de Arzúa.
A inscrición, que é gratuíta, debe formalizarse no Centro de Información ás Mulleres do Concello de Arzúa, chamando ao 981 501 101 ou nesta ligazón. As prazas son limitadas e o prazo para anotarse remata o 24 de abril.
