Neira presenta no Pino o libro ‘A Espiritada de Gonzar’ no que recolle documentación inédita

Na primeira metade do século XIX Josefa de la Torre pasou 40 anos deitada na cama alimentándose só da hostia consagrada 

Laura Moure/O Pino

Na primeira metade do século XIX, Josefa de la Torre (1773-1848) caeu enferma pouco despois de cumprir os 30 anos e sobrevivíu 42 anos sen comer nin beber, circunstancia acreditada polas autoridades médicas, civís e relixiosas da época. Juan Félix Neira Cruz, catedrático de Latín do IES Eduardo Pondal de Ponteceso, presentou este martes no Pino o libro A Espiritada de Gonzar. Do xaxún á santidade no que narra a historia desta veciña de Gonzar que se alimentaba só da hostia consagrada que lle levaba o cura de cando

en vez.

Juan Félix Neira, Manuel Taboada, José María Vázquez e Eva Varela, co público asistente detrás.

Juan Félix Neira recolle no libro moita documentación inédita sobre o caso, “que ata o

momento permaneceu muda nos arquivos”, dixo durante a presentación. O autor agradeceu a colaboración do Concello de O Pino, especialmente a do seu alcalde, Manuel Taboada, e a da Deputación da Coruña, que fixeron posible a publicación deste libro.

Manuel Taboada agradeceulle ao autor o traballo realizado para investigar máis sobre a vida dunha veciña do Pino que, no seu día, “chamou a atención de moitos persoeiros e

institucións, dende o Arcebispado de Santiago, ata a Academia Galega de Ciencias, estamentos militares ou Emilia Pardo Bazán e Valle-Inclán”, asegurou.

Publicidade

Preme na imaxe se queres contactar connosco.

Para Juan Félix Neira, este “é un caso de película”. En 2022 estreouse El prodigio, ambientada na rexión das Midlands irlandesas e que conta a historia dunha nena de 11 anos que en 1862 estivo anos sen comer. “Aínda que posterior no tempo, é un caso similar ao de Josefa de la Torre”, asegurou o autor durante a presentación.

Á presentación deste libro asistiron a concelleira de Cultura do Pino, Eva Varela, e veciños do municipio. Juan Félix Neira Pérez é catedrático de Latín no IES Eduardo Pondal de Ponteceso, e profesor de Literatura Española e Clásica na UNED da Coruña. Xunto á docencia gusta da investigación arquivística. Actualmente prepara a súa tese de doutoramento sobre a arte relixiosa no arciprestado de Seaia.

ECOS DA COMARCA tamén publicamos sobre isto: https://www.ecosdacomarca.com/post/a-muller-do-pino-que-estivo-40-anos-sen-comer