Monterroso reorganiza as aulas da gardería municipal para garantir praza a todas as familias solicitantes
O rexedor mantivo hoxe unha xuntanza coa dirección do centro e coas familias que inicialmente quedaran sen praza
Ecos da Comarca/Monterroso
O Concello de Monterroso reorganiza as aulas da Gardería Municipal para garantir praza a todas as familias solicitantes. O alcalde de Monterroso, Eloy Pérez, mantivo na mañá de hoxe unha reunión coa directora da Gardería Municipal e coas familias que inicialmente quedaran sen praza no centro tras o proceso de baremación de solicitudes.
Despois da primeira reunión da comisión de baremación, seguindo os criterios establecidos na normativa vixente, quedaran sen praza a 7 familias solicitantes. Ante esta situación, unha das familias presentou un recurso formal, o que obrigou á convocatoria dunha segunda reunión da comisión para a súa valoración e resolución.
Como resultado deste proceso e ante a vontade expresa do Goberno local de atopar unha solución viable que garantise o acceso á Gardería Municipal para todas as familias interesadas, decidiuse proceder a unha reorganización interna das aulas.
Publicidade
Grazas á colaboración entre a Dirección do centro e o Concello, e á comprensión das familias afectadas, conseguiuse dar resposta a todas as solicitudes, garantindo así o dereito á conciliación e o acceso á gardería municipal en condicións de equidade.
Publicidade
O Concello de Monterroso reitera o seu compromiso coa conciliación familiar e coa atención ás necesidades das familias do municipio e agarda que esta solución sexa de agrado para todos e todas.
Comentarios