Habrahan Ochum gaña o II Concurso de Murais do Concello do Pino coa proposta 'O último selo'

O artista logra un premio de 2.000 euros e executará un mural inspirado na última etapa do Camiño Francés e na Festa do Galo Piñeiro

Laura Moure/O Pino

O artista Habrahan Ochum Barrios Cortez é o gañador do II Concurso de Murais do Concello do Pino coa proposta O último selo, unha obra que será plasmada nun mural de gran formato e que contribuirá a reforzar a identidade turística e cultural do municipio, tomando como fío condutor dous dos seus principais sinais de identidade: o Camiño de Santiago e a Festa do Galo Piñeiro.

O xurado, reunido o 24 de xullo, acordou por unanimidade conceder o primeiro premio á

proposta gañadora tras valorar as oito obras admitidas a concurso. O último selo obtivo a

máxima puntuación posible, 15 puntos, ao destacar nos tres criterios establecidos nas bases: adaptación á temática, orixinalidade e dificultade técnica.

 PUBLICIDADE

Preme na imaxe para obter máis información deste evento.

Na súa valoración, o xurado salientou que a proposta representa "de maneira excelente a

condición do Concello do Pino como última etapa do Camiño Francés", integrando tamén

elementos propios da Festa do Galo Piñeiro nunha composición de grande forza simbólica.

Así mesmo, destacou que o concepto do selo da persoa peregrina como elemento central

do mural constitúe "unha proposta singular, innovadora e perfectamente recoñecible", con

capacidade para converterse nun novo elemento identificativo do municipio. Tamén puxo

en valor a elevada calidade estética da obra e a súa notable viabilidade para ser executada sobre un soporte mural de gran formato.

O concurso contou finalmente con oito propostas admitidas, presentadas baixo lema para garantir o anonimato durante o proceso de valoración. O xurado estivo presidido polo

alcalde, Manuel Taboada, e integrado polo concelleiro José Fuentes, os artistas Cándido

Pazos e María Cruz Piñeiro, actuando como secretario Manuel Rodríguez.

 PUBLICIDADE

Preme na imaxe para obter máis información do evento.

Como gañador, Habrahan Ochum recibirá un premio de 2.000 euros. Ademais, o Concello

asumirá a adquisición dos materiais necesarios para a execución da obra ata un importe

máximo de 1.000 euros (IVE incluído).

 PUBLICIDADE

Preme na imaxe se quere contactar connosco.

A realización do mural comezará esta mesma semana, co obxectivo de que estea xa concluída de cara á celebración esta fin de semana da Festa do Galo Piñeiro. Coa segunda edición deste certame, o Concello do Pino consolida unha iniciativa que busca

embelecer espazos públicos mediante intervencións artísticas de calidade, ao tempo que promove a difusión dos principais recursos patrimoniais, culturais e turísticos do municipio

a través da arte urbana.