Falece Maricarmen, a muller de 87 anos convertida en símbolo da loita contra os desafiuzamentos

Ecos da Comarca/Xeral

María del Carmen Abascal, coñecida como Maricarmen, faleceu hoxe, 7 de outubro, aos 87 anos no Hospital Gregorio Marañón de Madrid despois de converterse nas últimas semanas en España nun símbolo da loita polo dereito á vivenda e contra os desafiuzamentos.

Maricarmen levaba arredor de sete décadas vivindo na mesma vivenda do barrio madrileño de Retiro. O pasado 23 de setembro foi finalmente desafiuzada tras varios intentos de desaloxo e despois dunha longa batalla xudicial coa empresa propietaria do inmoble. O operativo provocou unha gran mobilización social e centos de persoas concentráronse para tentar impedir que abandonase o seu fogar.

 PUBLICIDADE

Preme na imaxe para obter máis información.

A muller tivo que ser trasladada en ambulancia ao hospital tras o desafiuzamento. O seu caso xerou unha enorme repercusión en toda España e impulsou mobilizacións en defensa do dereito a unha vivenda digna. A súa historia chegou tamén ao debate político, no medio da discusión sobre as medidas para protexer as persoas vulnerables fronte aos desafiuzamentos.

 PUBLICIDADE

Preme na imaxe para contactar connosco.

Nos últimos días chegouse a anunciar un acordo que permitiría o seu regreso á vivenda. “Todos somos Maricarmen”, foi un dos lemas que acompañou as mobilizacións xurdidas tras o seu desafiuzamento. Sen embargo, o caso de Maricarmen tamén xerou un intenso debate social, con defensores da súa situación e da súa loita polo dereito á vivenda, pero tamén voces críticas e detractoras da súa postura e das mobilizacións arredor do desafiuzamento.