Dous feridos nunha colisión entre dous camións e dous turismos na A-6, ao seu paso por Baralla

Ecos da Comarca/Xeral

Dúas persoas resultaron feridas nun accidente de tráfico rexistrado esta mañá na A-6 ao seu paso polo municipio de Baralla, e no que se viron implicados dous camións e dous turismos. Un dos camións transportaba gando e varios animais faleceron ao precipitarse polo desnivel sobre o que quedou envorcado o vehículo.

O accidente. (Captura cámaras da DXT)

O sinistro produciuse pouco antes das 9 horas no quilómetro 464 da autovía, en sentido Madrid. Segundo recolle o 112 Galicia, un particular alertou de que un camión envorcara sobre un turismo, deixando atrapada á súa condutora. Minutos despois, a propia implicada púxose en contacto co Centro Integrado de Atención ás Emerxencias para comunicar que estaba ferida. A pesar do aparatoso do accidente, conseguiu abandonar o vehículo polos seus propios medios antes da chegada dos equipos de emerxencia.

 PUBLICIDADE

Preme na imaxe para obter máis información deste evento.

Ata o lugar desprazáronse efectivos de Urxencias Sanitarias de Galicia-061, da Garda Civil de Tráfico, dos Bombeiros de Sarria e dos servizos de conservación da autovía. Os bombeiros confirmaron que non foi preciso realizar labores de excarceración. Con todo, un dos camións transportaba gando e quedou suspendido lateralmente sobre un importante desnivel. Varios dos animais faleceron ao caer do vehículo.

Como o sinalou a Garda Civil de Tráfico, no sinistro víronse implicados dous camións e dous turismos. Dúas persoas tiveron que ser trasladadas en ambulancia polos servizos sanitarios.

 PUBLICIDADE

Contacta con nós!

Nestes momentos servizos de emerxencias continúan traballando na zona para estabilizar o camión accidentado e restablecer a circulación o antes posible.