Do Campo destaca os case 138.000 euros investidos na mellora de infraestruturas rurais de Boimorto

A delegada da Xunta avaliou coa alcaldesa as aportacións da Xunta que serven para a mellora de camiños de acceso a parcelas agrícolas

Laura Moure/Boimorto

A delegada da Xunta na Coruña, Belén do Campo, visitou onte o concello de Boimorto, acompañada pola súa alcaldesa, María Jesús Novo, polo concelleiro Marcos Fernández, e pola directora territorial da Consellería de Medio Rural, Nieves Mancebo, e salientou alí o investimento de case 138.000 euros para varias intervencións ao amparo do Plan Marco de Mellora de camiños rurais de acceso a parcelas agrícolas.

O Plan Marco, está dotado en Galicia con case 19,5 millóns de euros para 2024 e 2025, o que supón o orzamento máis alto dende 2017. En concreto, no marco desta convocatoria, están aprobadas actuacións en Boimorto de máis de 68.600 euros para a mellora da camiño de Vilanova e Segade, do camiño de Castro ó Cando e da pista no Pazo. Un investimento que se une ao realizado, na convocatoria 23-24, de máis de máis de 69.200 euros que permitiu a mellora do camiño de Vilanova-Tixosa. A delegada da Xunta informou que na comarca de Santiago recibiron, no 24-25, estas axudas 22 concellos por un importe total de máis de 1,4 millóns de euros e na provincia da Coruña recibiron estes apoios 83 concellos por un importe de 5,2 millóns de euros.

Esta orde promove a ampliación, mellora ou mantemento dos camiños municipais de acceso a parcelas agrícolas co fin último de aumentar a competitividade agraria e forestal, xa que facilitan o tránsito de maquinaria ás explotacións agrarias, o que redunda nunha maior axilidade das operacións agrarias e nunha redución de custos e dos tempos necesarios para poñer os produtos no mercado.

Durante o período 2016-2024 contou cunha dotación orzamentaria de máis de 130 millóns de euros, permitindo a mellora de máis de 5.450 camiños e máis de 4.280 quilómetros de vías rurais e a provincia da Coruña foi a que máis importe económico recibiu desta iniciativa na etapa mencionada, superando os 40 millóns de euros, e polo tanto, na que máis actuacións se produciron.

Publicidade

Preme na imaxe para obter máis información do evento.

A delegada engadiu que a través de iniciativas coma esta, “a Xunta mantén o compromiso coa promoción e coordinación do desenvolvemento do territorio rural galego”. O Plan Marco ten unha traxectoria que se remonta a 2013. En cada convocatoria do Plan de mellora de camiños municipais de acceso a parcelas agrícolas repártense entre os 313 concellos os fondos dispoñibles e corresponde a cada un deles a elección dos camiños sobre os que se considera preciso actuar, así como o proxecto de obra de ampliación, mellora ou mantemento. Ademais, estes están obrigados a contratar un servizo externo de control de calidade das obras executadas.

Nova convocatoria

Durante a visita a delegada lembrou que xa está aberta a nova convocatoria do Plan Camiña Rural da Consellería do Medio Rural para o período 2025-2026, dotado con preto de 19,5 millóns de euros de fondos propios. O investimento está distribuído en dúas anualidades, 9,5 millóns de euros para 2025 e 9,99 millóns para 2026. Este programa ten como obxectivo financiar as actuacións de mellora ou mantemento dos camiños municipais que dan acceso en calquera punto do seu trazado a polo menos dúas parcelas agrícolas. O prazo está aberto ata o 28 de febreiro.

Publicidade    

Preme na imaxe se queres contactar connosco.

Todos os concellos de Galicia poden ser beneficiarios destas axudas, pártese dunha asignación fixa por localidade que se incrementa en función do número de entidades de poboación, criterios de agrariedade e outras cuestións vencelladas coa superficie e a localización do municipio.

En definitiva, serán subvencionables as actuacións de ampliación, que supoñan un incremento da lonxitude dos camiños, que incidan na seguranza viaria e permitan o cruce de vehículos; de mellora, para reforzar o firme existente coa incorporación de novas capas e a adecuación de obras de paso de cursos fluviais; e o mantemento do firme e as súas marxes.