‘Conciliamos Viaxando coa Cativada’ do Pino pecha con éxito a súa segunda edición

O programa gratuíto permitiu que a cativada deste municipio desfrutase de cinco xornadas educativas e recreativas en distintos destinos de Galicia

Laura Moure/O Pino

A segunda edición de Conciliamos Viaxando coa Cativada, organizada polo Concello do Pino a través da Concellería de Muller e Benestar Social, pechouse este xoves 4 de setembro cun rotundo éxito entre a cativada e as súas familias. Este programa de ocio educativo e conciliación familiar, que regresaba tras o éxito da primeira convocatoria, ofreceu durante cinco xornadas gratuítas aos nenos e nenas de entre 6 e 12 anos experiencias lúdicas, educativas e ao aire libre nos meses de agosto e setembro.

Ao longo das cinco excursións, que se celebraron os martes e xoves, a rapazada do Concello do Pino tivo a oportunidade de:

• Descubrir a maxia e a natureza na Aldea Grobit en O Grove.

• Mergullarse no mundo dos monicreques e xoguetes no Museo Galego da Marioneta e

dos Xoguetes no Pazo de Liñares, en Lalín.

• Ampliar coñecementos científicos e culturais no Museo Nacional de Ciencia e Tecnoloxía (Muncyt) e gozar da contorna natural da Torre de Hércules, na Coruña.

• Aprender sobre a relación histórica de Galicia co mar e os ecosistemas mariños no Museo do Mar de Galicia, en Vigo.

• Coñecer a vida salvaxe no Parque Marcelle (Lugo), pechando a actividade cunha xornada educativa e divertida que quedará na memoria de todos os participantes.

Publicidade

Preme na imaxe para obter máis información do evento.

Cada saída contou cun máximo de 50 prazas, priorizando as familias empadroadas no

Concello e as participantes noutros programas de conciliación municipais, co obxectivo de

que o maior número posible de menores puidese gozar desta experiencia. Todas as excursións foron de balde, sen ningún custo para as familias, reforzando así o compromiso

do Concello do Pino por ofrecer alternativas de conciliación real e ocio educativo durante o

verán.

Publicidade

Preme na imaxe se queres contactar connosco.

A iniciativa, financiada pola Consellería de Política Social e Igualdade e polo Ministerio de

Igualdade dentro do Plan Corresponsables, é unha aposta firme do Concello do Pino pola

conciliación das familias e por ofrecer experiencias enriquecedoras aos máis pequenos,

promovendo á vez valores de convivencia, aprendizaxe e respecto pola natureza.