Comezan as obras de humanización da rúa Fraga de Rei en Arzúa

As actuacións contan cun investimento de máis de 250.000 euros, que permitirán renovar íntegramente un tramo do céntrico vial

Laura Moure/Silleda

Este xoves comezaron en Arzúa as actuacións que, nun prazo estimado de tres meses, permitirán renovar completamente a imaxe dunha das rúas máis céntricas do casco urbano do municipio, a rúa Fraga de Rei. A empresa Construcciones Leonardo Miguélez, S.L. será a encargada de realizar os traballos de humanización dun tramo deste vial que vertebra a vila de Arzúa e que permitirá incrementar a súa seguridade e mellorar notablemente os seus servizos.

O goberno municipal de Alternativa por Arzúa e PSdG-PSOE atende así unha demanda, que vén de moitos anos atrás, de todos os veciños e veciñas de Arzúa. A actuación conta cun orzamento de 250.306,65 euros, que serán sufragado con fondos municipais procedentes do remanente de tesourería grazas á boa xestión económica do actual goberno local, tal e como sinala o Concello.

Corte ao tráfico

O tramo sobre o que se vai actuar ten unha lonxitude aproximada de 200 metros e as actuacións farán necesario o corte ao tráfico desta rúa para facilitar os traballos de acondicionamento e mellora do vial.

Comezarase por levantar o actual pavimento e os servizos cos que se conta na actualidade para, posteriormente, renovalos na súa totalidade e facer desta rúa un entorno máis accesible, no que poidan circular con maior seguridade os vehículos e no que os veciños e peóns transiten con maior facilidade e comodidade. Este tramo será sometido a unha remodelación total no que convivirá unha parte aglomerada con outra de formigón desactivado; tamén se renovará o mobiliario urbano e as luminarias.

O alcalde de Arzúa, José Luis García, manifestaba este xoves, ante o comezo das actuacións, a súa satisfacción por poder “facer realidade, pouco a pouco, unha demanda dos nosos veciños que dende hai moito tempo viñan reclamando o acondicionamento dunha das rúas principais do municipio, na que se facía moi necesario incrementar a súa seguridade e facela máis accesible e segura para os cidadáns”.

Pola súa parte, a titular da área de Obras e Servizos Municipais, a socialista Begoña Balado, adiantou que “unha das nosas prioridades agora e na que xa estamos traballando e en conseguir financiamento que nos permita adecentar por completo a rúa nunha fase posterior, para que os veciños poidan desfrutala na súa totalidade”.

"O comezo das actuacións este xoves non só van permitir que Arzúa gañe en seguridade e accesibilidade senón que tamén serven para desmentir a algún dos grupos políticos da oposición municipal que na pasada campaña electoral trataron de desacreditar ao goberno municipal negando a existencia dalgún proxeto de mellora previsto para a rúa Fraga do Rei; a realidade demostra agora o contrario", recalcan dende o Concello.