Chega a Silleda o día 10 “Pelica de Burra”, un obradoiro de contos e música para as familias
- Laura Moure
- hace 2 horas
- 1 Min. de lectura
Laura Moure/Silleda
A narradora oral e actriz Vero Rilo chega a Silleda co seu espectáculo Pelica de Burra, unha proposta artística que mestura música e narración nunha posta en escena dinámica, divertida e chea de emoción. O evento celebrarase o 10 de maio ás 12:00 horas na Praza Señor Afranio, de acceso gratuito e dirixido a todos os públicos, e en especial a familias con cativos a partir de 4 anos. En caso de choiva, a actividade trasladarase ao salón de actos do Concello.
A proposta enmárcase no programa FalaRedes, impulsado pola Secretaría Xeral de Política Lingüística da Xunta de Galicia, que ten como obxectivo a dinamización da lingua galega a través de iniciativas culturais en concellos da Rede de Dinamización Lingüística. Ademais é unha das actividades que conforma a programación das Letras Galegas 2025 “Cantareiras Silleda” do Concello de Silleda.
Publicidade
Pelica de Burra é un espectáculo de historias cotiás, retranca e música en directo, no que Vero Rilo estará acompañada por un músico sobre o escenario. Unha combinación da oralidade con sons contemporáneos que crea un espazo para o humor e a reflexión.
Publicidade
A actuación é de acceso libre e gratuíto, e forma parte da aposta do Concello de Silleda pola cultura de proximidade e pola promoción do galego como ferramenta de cohesión e identidade.
