Esta iniciativa que continuará mañá no centro arzuán está centrada nas empresas agroalimentarias
Laura Moure/Arzúa
Esta mañá celebrouse no centro de formación profesional e promoción rural Efa Piñeiral (Arzúa) a primeira sesión do curso “Innovación en márketing, branding e packaging nas empresas agroalimentarias” promovido pola Fundación Juana de Vega.
Xosé Luis Reza (Presidente do Cluster do Ecommerce Galego) foi o encargado de impartir a xornada a profesionais, emprendedores e produtores poñendo o foco nos fundamentos que un plan de márketing ten que contemplar para achegar a diferenciación precisa para o éxito da iniciativa. “Márketing é entender o que o cliente quere e en consecuencia traballar a proposta de valor baseada nas vantaxas competitivas. A calidade dun produto non existe se o cliente non a coñece e non a recoñece”, afirmou Reza.
O curso complétase coa xornada de mañá, venres, na que expertos en márketing como Xosé Teiga (Teiga Studio), Rosa Pumar ( Axencia Imaxe) e Alfonso Pérez (CEO en Foodtec) abordarán a importancia do branding, do páckaging e as tendencias no mesmo. Trala celebración das ponencias, e de degustar dun aperitivo elaborado polo alumnado do
ciclo de panadaría e pastelaría da Efa Piñeiral con produto das empresas colaboradoras no evento, os asistentes poderán participar nas visitas ás empresas Galmesán, Pazo de Santa María e Queixería Barral.
