Berce do Ulla participa na concentración de Lugo contra as macroplantas de biogás

Tamén se reuníu con Antonio Gato Soengas, concelleiro non adscrito de Monterroso

Ecos da Comarca/A Ulloa

Este sábado 31 de maio, o Colectivo Veciñal Berce do Ulla participou activamente na

concentración convocada en Lugo, diante do edificio da Xunta, no marco das mobilizacións estatais contra a instalación masiva de macroplantas de biogás

promovidas por intereses privados e sen garantías ambientais suficientes. Durante o acto, ao que acudiron colectivos de toda a provincia e de diferentes puntos de Galicia, estiveron presentes figuras políticas relevantes, como o alcalde de Lugo, Miguel Fernández Méndez, a anterior rexedora Lara Méndez López, hoxe vicesecretaria xeral do PSdeG-PSOE, e Rubén Arroxo, membro do goberno municipal polo BNG. A representación política da comarca da Ulloa veu da man de Antonio Gato Soengas, concelleiro non adscrito de Monterroso e referente histórico na política comarcal.

"A nosa asociación tivo a oportunidade de compartir pancarta co propio Antonio Gato Soengas, quen foi o único representante político da comarca da Ulloa que presentou unha moción en contra dunha planta de biogás, concretamente contra a de Antas de Ulla, actualmente paralizada pola falta de acceso aos terreos públicos onde se pretendía instalar", sinala o colectivo.

Ademais, informa que antes da concentración, "reunímonos con Gato Soengas para agradecerlle a súa valentía e compromiso na defensa do territorio, así como para trasladarlle a nosa preocupación ante a posible chegada dun novo proxecto a Monterroso. Segundo anunciou o alcalde no último pleno municipal, unha empresa manifestou interese en instalarse no polígono industrial, aínda que enfrontaría trabas administrativas polo tipo de actividade que desenvolve. Segundo o rexedor, trataríase dunha investimento de máis de 20 millóns de euros e xeraría 24 empregos directos, cifras que nos fan sospeitar que

poderiamos estar ante outro intento de instalación dunha planta de biogás".

Publicidade

Preme na imaxe se queres contactar connosco.

Na moción presentada polo concelleiro "xa se subliñaba a inadecuación da localización

escollida para a planta de Antas de Ulla, un aspecto que dende Berce do Ulla

consideramos fundamental: non pode permitirse que instalacións desta magnitude se

implanten sen planificación, sen avaliación de impacto e sen ter en conta a proximidade

ás vivendas e á riqueza ambiental do territorio".

Dende esta asociación reiteran o seu compromiso coa defensa do territorio da Ulloa e reivindica "unha moratoria na tramitación destes proxectos mentres non exista unha lexislación clara, rigorosa e con garantías. A concentración de onte, sumada ás mobilizacións en todo o Estado, demostra que cada vez máis persoas rexeitan un modelo industrial contaminante, especulativo e alleo aos intereses do rural galego", conclúe.