Arzúa reivindicará o domingo 29 o orgullo, diversidade e compromiso cos dereitos LGTB+
O Concello conmemora o Día do Orgullo cun programa de actividades pensadas para toda a veciñanza, que mestura reflexión, artes escénicas e festa cunha firme defensa da liberdade e a dignidade das persoas LGTB+
Laura Moure/Arzúa
Este domingo 29 de xuño, os xardíns da antiga Casa de Correos de Arzúa converteranse nun espazo de encontro, reivindicación e visibilidade co gallo da conmemoración do Día Internacional do Orgullo LGTB+. A iniciativa, promovida polo Concello de Arzúa a través da área de Igualdade, desenvolverase durante a mañá e contará cun programa diverso e inclusivo que mestura pensamento crítico, artes escénicas e música, ao tempo que reivindica os dereitos das persoas do colectivo.
A xornada comezará ás 12:00 horas cun faladoiro aberto ao público titulado “Voces LGTB en Arzúa: ser, sentir e existir en liberdade”, no que participarán persoas do colectivo como Daniel Regueiro, María Roibás, Xián Senín e Iria Carreira, que compartirán as súas experiencias persoais desde unha perspectiva rural e galega. Trátase dunha conversa honesta e necesaria, nun momento no que os indicadores sociais e institucionais alertan dun retroceso nos dereitos e dunha preocupante normalización dos discursos de odio. De xeito simultáneo, as crianzas maiores de tres anos poderán asistir á obra teatral “Daniel e Daniela”, da compañía Trémola Teatro, que aborda a realidade das persoas trans desde a infancia, con sensibilidade e vocación pedagóxica. O Concello habilitará tamén un espazo concilia para facilitar a participación das familias na actividade principal.
Publicidade
A mañá rematará cunha sesión vermú musical a cargo de DJ Misa, nun ambiente festivo e de convivencia pensado para compartir, gozar e celebrar a diversidade.
A concelleira de Igualdade, Lucía López, destacou a relevancia de reivindicar unha data como esta no contexto actual: “Estamos nun contexto político no que, por primeira vez en moito tempo, os discursos que negan a realidade e as violencias ás que se enfronta o colectivo LGTB+ teñen unha enorme cobertura mediática. Desde a Concellería de Igualdade queremos ser claras e reivindicar unha data que segue a ser necesaria, porque falamos do dereito a existir en liberdade e dignidade, sen que a orientación sexual ou a identidade de xénero poidan ser motivo de odio, exclusión ou violencia.
Publicidade
“Coa Festa do Orgullo queremos lanzar e reivindicar unha cuestión clave: o Concello de Arzúa traballará sempre para garantir espazos seguros para as persoas do colectivo LGTB+ e terá moi presente, nas súas políticas públicas, as desigualdades estruturais que aínda persisten.Somos conscientes de que, aínda hoxe, moitas persoas seguen a sufrir discriminación no ámbito familiar ou laboral tras visibilizar a súa orientación sexual ou identidade de xénero. As institucións temos a responsabilidade de reverter esa realidade, tamén desde as políticas do día a día.”
A Festa do Orgullo conta coa colaboración da Festa dos Botes, un colectivo no que se aglutina a xuventude arzuá, comprometida e participativa, sempre presente nos actos de reivindicación social promovidos polo Concello.
Comentarios