Arzúa reforza a súa aposta como destino verde cunha xornada micolóxica o día 21
O micólogo Luis Cuba guiará unha saída de campo e se completará cunha exposición e unha charla na antiga Casa de Correos
Laura Moure/Arzúa
A Concellería de Turismo de Arzúa, que dirixe Begoña Balado, organiza o sábado 21 de
novembro de 2026 unha xornada micolóxica dentro do programa Arzúa Camiña. A iniciativa forma parte da aposta do municipio por consolidarse como destino verde. Aberta a todos os públicos, a actividade combina un percorrido pola contorna da Fonte Santa cunha exposición dos exemplares recollidos e unha charla sobre os cogomelos de Galicia.
A xornada contará con Luis Cuba, micólogo, divulgador e autor de numerosas publicacións sobre os cogomelos de Galicia. Durante a saída, acompañará as persoas participantes na identificación dos exemplares que vaian atopando. A exposición permitirá examinalos con máis calma e comparar as características que axudan a distinguir unhas especies doutras.
"Queremos que a xente se achegue aos bosques de Arzúa con curiosidade e aprenda a
recoñecer os cogomelos que medran neles. Poder observar os exemplares no monte e
comparalos despois na exposición é unha maneira de entender a súa diversidade e a
importancia de conservar os lugares onde medran", sinala a concelleira de Turismo, Begoña Balado.
PUBLICIDADE
O programa comezará ás 9:00 horas cunha saída de campo polos bosques da contorna da Fonte Santa. O percorrido, que rematará ás 12:00 horas, incluirá a identificación e recollida de exemplares. De 12:00 a 14:00 horas, os cogomelos recollidos durante a mañá expoñeranse e clasificaranse na antiga Casa de Correos, na rúa das Dores, número 3.
No mesmo lugar, ás 16:30 horas, Luis Cuba impartirá a charla «Os cogomelos de Galicia:
coñecemento, uso e conservación». A sesión abordará os usos dos cogomelos, o seu papel nos ecosistemas e a importancia de conservar os seus hábitats.
PUBLICIDADE
Con esta xornada, Arzúa Camiña amplía a oferta de turismo de natureza do municipio no
outono e convida a veciñanza e visitantes a coñecer a biodiversidade dos bosques de Arzúa e a importancia de conservalos.
A xornada dispón de 30 prazas e require inscrición previa na Oficina de Turismo de Arzúa, no teléfono 981 508 056 ou no correo electrónico info@turismoarzua.gal
Comentarios