Arzúa presenta a súa programación para o Día do Comercio Local 2025

O programa inclúe animación de rúa, actividades para público familiar, promocións especiais nos establecementos participantes e un sorteo presencial

Laura Moure/Arzúa

A Concellaría de Turismo, Promoción Económica e Acción Urbana do Concello de Arzúa avanza nos preparativos dunha nova edición do Día do Comercio Local, que se celebrará do 6 ao 8 de decembro. Begoña Balado presentou o xoves a programación completa nunha reunión que contou coa participación de representantes dos 35 establecementos adheridos, cifra que supón un récord de participación con respecto a edición anteriores.

Durante o encontro, a concelleira detallou unha proposta de actividades orientada a dinamizar o comercio e a hostalaría do municipio nestas datas, que coinciden coa feira quincenal e co inicio da campaña de Nadal. O programa inclúe animación de rúa, actividades para público familiar, promocións especiais nos establecementos participantes e un sorteo presencial.

O programa arrancará o sábado 6 de decembro coa posta en marcha do Tren Turístico, con saída dende a Praza de Galiza, e servizo tanto o sábado como o domingo en horario de tarde, de 16:00 a 20:00 horas. O luns 8, o Tren Turístico volverá estar operativo con horario ampliado, de 11:00 a 14:00 horas e de 16:00 a 20:00 horas, facilitando así a participación das familias durante toda a xornada festiva.

Tamén o día 8, a Praza de Galiza acollerá inchables, xogos e obradoiros dirixidos ao público infantil e familiar entre as 16:00 e as 20:00 horas, contribuíndo a crear un ambiente lúdico no centro da vila. Pola súa banda, a animación musical chegará da man da Charanga BB+, que percorrerá a feira e as rúas do casco urbano entre as 11:00 e as 14:00 horas. Xa pola tarde-noite, ás 19:30 horas, a Rondalla Moraima e as Pandeireteiras de Montefurado visitarán os establecementos hostaleiros participantes, amenizando o ambiente e contribuíndo á dinamización dos locais.

A programación do día 8 culminará co sorteo dun iPhone 16, que terá lugar de forma presencial na Praza de Galiza ás 20:30 horas. Entrarán neste sorteo todas aquelas persoas que, durante os días da campaña, realicen compras ou consumicións superiores a 5 euros nos establecementos adheridos e depositen previamente o seu boleto nas urnas habilitadas en cada local.

 Publicidade

Preme na imaxe para obter máis información.

As bases completas do Día do Comercio Local poden consultarse na páxina web do Concello de Arzúa: www.arzua.gal

A concelleira Begoña Balado subliñou que, “dende o Concello, queremos darlle continuidade e máis pulo ao Día do Comercio Local, incrementando o orzamento e incorporando novas propostas arredor desta celebración”. Ademais, avanzou que o Goberno local está a traballar en “novas accións de dinamización comercial e de apoio

ao comercio de proximidade, que se desenvolverán tanto durante o Nadal como ao longo do vindeiro ano 2026”.

Publicidade

Preme para contactar con nós e pregunta polas tarifas que son unha bicoca!

Balado aproveitou tamén para agradecer a destacada implicación do tecido comercial e hostaleiro, recollendo as súas achegas e suxestións co obxectivo de seguir mellorando esta iniciativa en futuras edicións e reforzando o papel do comercio local e da hostalaría como motores económico de Arzúa.