Arzúa organizou unha reunión coa Ruta Europea do Queixo para presentar o proxecto ás queixerías locais

O obxectivo do encontro foi explicar o funcionamento da AREQ e presentar os proxectos e oportunidades de colaboración

Laura Moure/Arzúa

O Concello de Arzúa celebrou unha reunión informativa coa Asociación Ruta Europea del Queso (AREQ), tras a súa recente adhesión a esta rede europea que conecta territorios con tradición queixeira. O obxectivo do encontro foi explicar o funcionamento da AREQ e presentar os proxectos e oportunidades de colaboración que ofrece tanto para o municipio como para as queixerías locais.

A xuntanza, celebrada na Casa do Concello, contou coa presenza do secretario técnico da AREQ, Javier Sánchez, quen explicou a dinámica de traballo da asociación e presentou o calendario de feiras de 2026, así como varias iniciativas en marcha, entre elas o proxecto “Queixo Creativo” en museos e centros de interpretación, o programa de recuperación de razas autóctonas en perigo de extinción e a publicación dunha revista semestral en formato papel e dixital coa participación dos socios.

Tamén se abordaron as vantaxes que ofrece a rede para os concellos asociados, como condicións preferentes para participar en feiras, a creación dunha imaxe corporativa común, o desenvolvemento de produtos de merchandising compartido e o acceso a axudas e convocatorias de ámbito estatal e europeo.

Na reunión participaron representantes do Concello e das queixerías do municipio: Queixería Barral (Juan Barral), Casa Donicio (Xoel Camino e Jennifer Montañés), Galmesano (Carmela Cano) e Verbas (Xosé Luís Fernández). O Concello estivo representado por Daniel Moscoso, terceiro tenente de alcalde, e por Ramón Roldán, coordinador e responsable de relacións públicas da Festa do Queixo.

Publicidade

Preme na imaxe se quere contactar connosco.

Daniel Moscoso destacou que “esta reunión serviu para explicar o funcionamento da Ruta Europea do Queixo e poñer en común as oportunidades que se abren para Arzúa e para as súas queixerías a través desta nova  adhesión”.

Tras este primeiro encontro, o Concello impulsará a creación dun grupo de traballo coas queixerías locais para coordinar a súa participación conxunta na AREQ e desenvolver proxectos comúns que reforcen a promoción do queixo de Arzúa a nivel internacional. Coa súa adhesión á Ruta Europea do Queixo, Arzúa dá un novo paso na promoción do municipio, da Festa do Queixo e do seu produto máis emblemático, consolidando a súa presenza no panorama europeo do queixo e reafirmando o seu papel como referente galego na cultura e na tradición queixeira.