Arzúa mobiliza 400.000 euros para mellorar pistas, ampliar o saneamento e rehabilitar a Casa Lagoeiro

Tres das obras serán adxudicadas nos vindeiros días, mentres que a Casa Lagoeiro será rehabilitada como vivenda de emerxencia social

Laura Moure/Arzúa

O Concello de Arzúa destinará 398.214,94 euros a catro obras promovidas desde a área municipal de Obras, da que é responsable o alcalde, Xoán Xesús Carril. Os investimentos permitirán mellorar dúas pistas das parroquias, ampliar a rede de saneamento no Camiño da Empegada e rehabilitar a Casa Lagoeiro para destinala a vivenda de emerxencia social.

Xoán Xesús Carril.

Nos vindeiros días serán adxudicadas as obras das dúas pistas e da ampliación do saneamento. No caso da Casa Lagoeiro, aprobarase o expediente de contratación e abrirase o prazo para que as empresas interesadas presenten as súas ofertas.

A actuación de maior investimento corresponde á pista que comunica Sisto e Salmonte, na parroquia de Pantiñobre, cun orzamento de 166.875,94 euros. Os traballos inclúen a renovación do firme con novo aglomerado, a reparación das zonas máis deterioradas, a limpeza das gabias para facilitar a saída da auga e o pintado da sinalización horizontal. Tamén se instalará un tramo de barreira de seguridade.

 PUBLICIDADE

Preme na imaxe para obter máis información deste evento.

Na pista que une Santa María coa igrexa de San Salvador investiranse 56.508,21 euros. A obra permitirá repoñer o pavimento, reparar os puntos en peor estado, limpar as gabias e renovar a sinalización horizontal.

As dúas intervencións mellorarán a seguridade e as condicións de circulación en pistas utilizadas a diario pola veciñanza das parroquias.

 PUBLICIDADE

Preme na imaxe para obter máis información do evento.

O Concello destinará 84.955,18 euros á ampliación da rede municipal de saneamento no Camiño da Empegada. A obra permitirá levar este servizo á zona mediante a instalación de novas tubaxes, pozos de rexistro e un sistema de bombeo que conectará coa rede xa existente.

A rehabilitación da Casa Lagoeiro contará cun investimento de 89.875,61 euros. O inmoble será acondicionado para o seu uso como vivenda de emerxencia social, destinada a dar unha resposta temporal a persoas ou familias que atravesen unha situación de especial necesidade.

 PUBLICIDADE

Preme na imaxe para obter máis información deste evento.

Coa aprobación do expediente de contratación iniciarase o proceso para seleccionar a empresa que executará as obras. “Cada unha destas obras responde a unha necesidade concreta: arranxar pistas utilizadas todos os días, levar o saneamento a unha nova zona e contar cunha vivenda municipal para atender situacións de emerxencia social. Son investimentos que se traducirán en melloras directas para a veciñanza”, sinala o alcalde e responsable da área de Obras, Xoán Xesús Carril.