Arzúa convoca unha reunión para explicar as axudas a actividades culturais, deportivas e educativas

As bases xa están dispoñibles e o prazo de solicitude permanecerá aberto desde hoxe, 17 de xullo, ata o 14 de agosto

Laura Moure/Arzúa

O Concello de Arzúa convocou unha reunión co tecido asociativo do municipio para explicar en detalle a nova convocatoria de subvencións municipais dirixidas ao desenvolvemento de actividades culturais, deportivas e educativas. O encontro celebrarase o martes 22 de xullo ás 20:30 horas, na antiga Casa de Correos.

As axudas, formuladas en réxime de concorrencia competitiva, están destinadas a asociacións legalmente constituídas, centros educativos e ANPAS. As solicitudes deberán tramitarse a través da sede electrónica do Concello, e o prazo permanecerá aberto ata o 14 de agosto.

A convocatoria, publicada esta semana no Boletín Oficial da Provincia da Coruña, distribúese en tres liñas de actuación:

• Actividades culturais : 17.000 euros

• Actividades deportivas : 34.000 euros

• Actividades educativas : 18.000 euros

• 
  

Unha das principais novidades desta edición é que se permitirá xustificar actividades realizadas ao longo do ano 2024, co obxectivo de paliar os efectos da ausencia de convocatoria nos dous exercicios anteriores. Para facelo posíbel, o Concello aprobou un reforzo orzamentario que duplica na práctica os fondos dispoñibles respecto a anos anteriores.

Desde o executivo municipal recoñecen que a falta de convocatoria en 2023 e 2024 foi un erro que cómpre asumir. “Non se trata unicamente de reactivar esta liña de financiamento para o tecido asociativo, senón de corrixir os erros e mellorar a convocatoria, tanto en accesibilidade como en transparencia e xustiza no reparto dos fondos”, sinala o alcalde de Arzúa, Xoán Xesús Carril.

Publicidade

Preme na imaxe para obter máis información do evento.

“Sabemos do esforzo que fixeron as entidades nestes anos, mantendo actividades culturais, educativas e deportivas con poucos recursos e moita vontade. Por iso era prioritario recuperar estas subvencións e melloralas”, engade.

Carril destaca que a reunión convocada busca ir máis alá dunha simple presentación técnica. “Queremos escoitar ás entidades, resolver dúbidas e establecer un diálogo directo que mellore a relación entre o Concello e o tecido asociativo. As subvencións teñen que estar ao servizo do común, e iso implica recoñecer o traballo feito, asumir o que se fixo mal e adoptar compromisos que lle devolvan tranquilidade e estabilidade ás asociacións de Arzúa. Coa reunión deste martes queremos renovar ese compromiso”.

Publicidade

Preme na imaxe se queres contactar connosco.

As bases reguladoras están dispoñibles na web municipal, onde se recollen os requisitos, a documentación necesaria e os criterios de valoración. O Concello anima ás entidades a participar activamente no proceso e a asistir á reunión, que ten como obxectivo facilitar a tramitación e garantir o acceso en igualdade de condicións.