Arzúa amplía o programa de envellecemento activo a máis parroquias do municipio

Laura Moure/Arzúa

A Concellería de Benestar Social do Concello de Arzúa continúa coa súa aposta polo envellecemento activo entre a poboación maior das parroquias do municipio, ampliando a cobertura do programa que xa leva tempo en marcha. Ata agora, o programa beneficiaba a 11 parroquias e, a partir deste curso, incorpóranse catro novas: Brandeso, Rendal, San Martiño e San Estevo, sumando un total de 15 parroquias.

Esta ampliación busca reforzar o compromiso do Concello coas persoas maiores, especialmente en zonas rurais afectadas pola despoboación e polo progresivo envellecemento da poboación. O programa pretende fomentar unha vellez saudábel, autónoma e socialmente conectada, facilitando a participación activa e o benestar das persoas maiores.

Os obxectivos principais do programa inclúen:

• Promover as relacións interpersoais e loitar contra a soidade non desexada en núcleos de poboación envellecidos.

• Fortalecer o sentimento de pertenza á parroquia e ao municipio.

• Fomentar un ocio san e saudábel adaptado ás persoas maiores.

• Impulsar a integración social e aumentar a autoestima mediante a participación activa en actividades de lecer.

• Mellorar as condicións físicas e psíquicas dos/as usuarios/as.

• Potenciar as habilidades sociais creando un ambiente de convivencia positivo e enriquecedor.

  
  

Horarios das actividades de Envellecemento Activo por parroquias:

Luns

1. A Mella: 15:45 - 16:45

2. Villadavil: 17:00 - 18:00

3. Burres: 18:10 - 19:10

Martes

1. Dombodán: 15:45 - 16:45

2. Viños: 17:00 - 18:00

3. Brandeso: 18:10 - 19:10

Mércores

1. Boente: 15:45 - 16:45

2. Castañeda: 17:00 - 18:00

3. Rendal: 18:10 - 19:10

Xoves

1. Vilantime: 15:45 - 16:45

2. Lema: 17:00 - 18:00

3. Pantiñobre: 18:10 - 19:10

Venres

1. San Martiño: 15:45 - 16:45

2. San Estevo: 17:00 - 18:00

3. Oins: 18:10 - 19:10

   
   

Publicidade

O concelleiro de Benestar Social, José Luis García López, destacou :"Estamos moi satisfeitos de poder ampliar o programa a máis parroquias e achegar estas actividades a un maior número de persoas maiores. Esta continuidade e expansión reflicten o compromiso da concellaría de Benestar Social para mellorar a calidade de vida dos nosos veciños e veciñas, fomentando a súa participación, saúde e benestar social."

A Concellería de Benestar Social anima a todas as persoas maiores interesadas a participar nas actividades, que darán comezo a partir do día 6 de outubro. Para máis información, as persoas interesadas poden dirixirse á sede da Concellería de Benestar Social ou contactar a través dos teléfonos e canles habituais do Concello de Arzúa.