Arzúa amplía a oferta de formación dixital para maiores de 60 anos con novos cursos en maio e xuño

Organizada por Cibervoluntarios en colaboración co Concello, busca acurtar a fenda dixital e mellorar a autonomía da veciñanza no uso do móbil, Internet e os servizos en liña

Laura Moure/Arzúa

O Concello de Arzúa amplía a súa oferta de formación dixital para maiores de 60 anos con novos cursos presenciais na Aula CEMIT, que se desenvolverán durante o mes de maio e parte do mes de xuño.

A iniciativa, organizada por Cibervoluntarios en colaboración co Concello de Arzúa, botou a andar a finais de abril cun primeiro curso de iniciación ao mundo dixital. A boa acollida desta primeira formación fixo que se ampliase a proposta inicial e que se habilitasen dúas quendas para dar resposta á demanda rexistrada.

Esta oferta formativa está dirixida á veciñanza maior de 60 anos e non require experiencia previa. O obxectivo é que as persoas participantes poidan adquirir competencias básicas, resolver dúbidas habituais e gañar seguridade no uso do móbil, de Internet e das ferramentas dixitais que forman parte da vida diaria.

Dentro desta mesma iniciativa, esta semana completáronse tamén as prazas do curso que comezará o 18 de maio, centrado na banca dixital e nas compras seguras en liña. Con todo, aínda quedan prazas dispoñibles para as formacións que se desenvolverán a finais de maio e comezos de xuño.

 PUBLICIDADE

Se queres obter máis información do evento preme na imaxe.

A proposta responde á necesidade de acompañar a veciñanza nun contexto no que cada vez máis servizos, trámites e formas de comunicación se realizan a través de Internet. Deste xeito, contribúe a acurtar a fenda dixital e a garantir a igualdade no acceso á información, aos dereitos e aos servizos públicos e privados que hoxe se prestan, en boa medida, a través da rede.

Neste sentido, os cursos buscan que as persoas participantes gañen autonomía, seguridade e confianza no uso das ferramentas dixitais. As sesións abordarán cuestións prácticas como a saúde dixital, a comunicación por WhatsApp e Telegram, o uso das redes sociais ou a prevención de riscos no contorno dixital.

Cursos con inscrición aberta

As formacións con prazas dispoñibles son as seguintes:

Tecnoloxía e benestar: Saúde na era dixital (+60) Datas: 25, 26, 27 e 28 de maio Horario: de 10:00 a 13:00 horas Data límite de inscrición: 11 de maio de 2026

Comunica con confianza: WhatsApp e Telegram (+60) Datas: 1, 2, 3 e 4 de xuño Horario: de 10:00 a 13:00 horas Data límite de inscrición: 18 de maio de 2026

Aprende a manexar as túas redes sociais (+60) Datas: 8, 9, 10 e 11 de xuño Horario: de 10:00 a 13:00 horas Data límite de inscrición: 25 de maio de 2026

Todas as formacións serán presenciais e desenvolveranse na Aula CEMIT de Arzúa, situada no Edificio de Servizos Múltiples, na rúa Lugo, 45.

 PUBLICIDADE

Preme para obter máis información.

As persoas interesadas poden inscribirse enviando un correo electrónico cos seus datos a comunicacion.alcaldia@concellodearzua.com ou chamando ao teléfono 981 500 000, extensión 111. O Concello de Arzúa anima a veciñanza maior de 60 anos a participar nesta proposta formativa, pensada para aprender con calma, resolver dúbidas e manexarse con máis confianza nun mundo cada vez máis dixitalizado.