Arzúa acolle a presentación da campaña para protexer ás peregrinas no Camiño de Santiago

Máis de 740 entidades da provincia da Coruña colaboran este ano

Laura Moure/Arzúa

A subdelegada do Goberno na Coruña, María Rivas, presentou esta semana en Arzúa unha nova edición da campaña “#NoCaminasSola: por un Camiño de Santiago libre de violencias machistas”, que este ano conta coa colaboración de 746 organizacións da provincia, 140 máis que o ano pasado. A iniciativa busca reforzar a seguridade das mulleres que emprenden o roteiro xacobeo en solitario mediante a difusión, en diferentes localizacións do Camiño de Santiago, de tarxetas e carteis informativos que inclúen un código QR que enlaza aos teléfonos dos recursos especializados en atención ás mulleres.

A campaña está promovida polas Unidades de Coordinación contra a Violencia sobre a Muller das Delegacións do Goberno de Galicia, Navarra, Aragón, A Rioxa, Estremadura e Castela e León, comunidades por onde discorre o Camiño de Santiago. “O ano pasado puxemos en marcha esta iniciativa por primeira vez e o certo é que a información que recibimos por parte das usuarias foi moi positiva, e por iso este 2022 queremos potenciar o seu alcance. Porque o máis importante é que as mulleres se sentan seguras e que gocen do Camiño”, asegurou Rivas.

O material informativo que inclúe a campaña distribuíuse o ano pasado en Galicia nos distintos roteiros do Camiño de Santiago, entre albergues, farmacias, comandancias e postos da Garda Civil, comisarías de Policía Nacional e dependencias da Policía Local. Este 2022 relánzase a campaña incluíndo como novidade a incorporación do Roteiro da Prata (na que participa a Comunidade Autónoma de Estremadura). Ademais, introdúcese o inglés con carteis e #tarxeta bilingües, co fin de chegar ao maior número de mulleres posibles, e amplíanse tamén os lugares de distribución, incorporando a centros de saúde e oficinas de turismo.

746 carteis e 14.920 tarxetas

En total, na provincia da Coruña, repartiranse 746 carteis e 14.920 tarxetas. Deste xeito, 144 albergues, 410 farmacias, 26 postos da Garda Civil, 5 comisarías da Policía Nacional, 30 da Policía Local, 82 centros de saúde e 49 oficinas de turismo dos concellos polos que discorre o Camiño, dispoñerán de diferentes recursos informativos para previr calquera tipo de violencia contra as peregrinas.

“Precisamos a implicación de toda a sociedade para erradicar a violencia machista”, resaltou a subdelegada, que tamén destacou a importancia da colaboración de todas estas entidades na difusión dunha campaña que “axudará a ter a información clara sobre todos os recursos dispoñibles e, por suposto, a sensibilizar, previr e denunciar as violencias que poden sufrír as peregrinas, así como a mellorar a protección e seguridade dos nosos amantes Camiños”.

Preme na imaxe se quere contactar connosco.

Na presentación da nova campaña, que tivo lugar ao pé do Camiño Francés, no albergue Don Quixote do concello de Arzúa, participaron tamén a tenente de alcalde de Arzúa, Begoña Balado; as concelleiras de Cultura e Facenda, Aurora Varela e Mari Carmen Torreiro; o tenente coronel e xefe accidental da Comandancia da Coruña, Fernando Pedreira; o comisario provincial da Policía Nacional na Coruña, Fernando Martínez Marty; e a presidenta do Colexio de Farmacéuticos da Coruña, Sara Catrain, entre outros representantes de entidades que colaboran na campaña. Tal e como explicou Rivas, nos últimos anos ven observando un aumento significativo das mulleres no Camiño, que hoxe representan máis da metade das persoas que peregrinan. Por iso, e co obxectivo de reforzar o compromiso do Goberno de España na loita contra a violencia de xénero e pola igualdade, “consideramos que é importante dar forza un ano máis a una campaña específica que da a coñecer ás peregrinas todas as ferramentas que o Executivo pon á súa disposición para previr e denunciar calquera tipo de violencia”.

A subdelegada recalcou que as mulleres “deben ter o dereito e a liberdade de poder facer o Camiño de Santiago soas deséxandoo, non pode ser que o medo a que suceda algo lles impida facelo. A mensaxe desta campaña é xustamente que non camiñan soas, que non corren risco porque no momento no que perciban calquera perigo sempre terán a alguén ao seu lado”.

Seguridade nas rutas

As Forzas e Corpos de Seguridade do Estado deseñan cada ano un plan específico para a protección de todas as persoas que transitan polo Camiño de Santiago. O dispositivo correspondente ao ano Xacobeo 2022 inclúe o despregamento das Oficinas Móbiles de Atención ao Peregrino (OMAPs), que se puxeron en funcionamento por primeira vez o ano pasado. Unha destas oficinas estivo tamén presente na presentación da campaña #NoCaminasSola. Ademais, a Garda Civil desenvolve a campaña de comunicación “Gardiáns do Camiño”, que inclúe a distribución de carteis con consellos de seguridade en varios idiomas e o fomento do uso da aplicación móbil Alertcops, que permite activar alertas en caso de emerxencia e traslada a localización por GPS dos dispositivos telefónicos nos que se instala, permitindo a localización das persoas usuarias en caso de necesidade. Tamén Policía Nacional reforza a súa presenza no roteiro xacobeo co proxecto Protexemos o Camiño: Ano Xubilar 2021-2022, para garantir a seguridade das persoas peregrinas e visitantes que percorren as diferentes etapas deste milenario roteiro.