Alfredo López Mosquera despídese do Concello de Silleda despois de 40 anos de dedicación

O funcionario municipal, que comezou a traballar no Concello en 1986, inicia unha nova etapa despois de catro décadas de compromiso e profesionalidade

Laura Moure/Silleda

O Concello de Silleda despideu onte a Alfredo López Mosquera, que vén de xubilarse despois de 40 anos de servizo como funcionario municipal. Catro décadas de traballo e dedicación nas que Alfredo se converteu nun rostro familiar para moitas xeracións de veciños e veciñas, especialmente para as persoas usuarias do Centro Cultural Vista Alegre.

A súa traxectoria profesional comezou no ano 1986 e estivo estreitamente vinculada ao ámbito cultural do municipio. O Centro Cultural Vista Alegre foi o seu principal lugar de traballo, especialmente dende que o histórico edificio foi restaurado e abriu as súas portas como equipamento cultural municipal.

Pero ao longo destes anos Alfredo tamén desenvolveu o seu labor noutras instalacións municipais, como as piscinas da Bandeira e diferentes dependencias culturais, demostrando sempre unha permanente disposición para botar unha man alí onde fixese falta. Precisamente, esa vontade de colaborar, a súa cercanía, e a súa implicación, así

como a súa labor na custodia de documentos, e outros materiais de distintos colectivos culturais son algunhas das calidades que destacan da súa traxectoria.

 PUBLICIDADE

Preme na imaxe para obter máis información do evento.

A alcaldesa de Silleda, Paula Fernández Pena, e a concelleira de Cultura e Persoal, Mónica González Conde, trasladáronlle onte, en nome de toda a Corporación municipal e da veciñanza, o seu agradecemento polos anos de servizo e os mellores desexos para esta nova etapa.

"Son 40 anos formando parte da vida deste Concello, 40 anos de traballo, de compromiso e de estar sempre disposto a colaborar. Persoas como Alfredo forman parte tamén da historia cotiá de Silleda, desa que se constrúe día a día, moitas veces de maneira discreta, pero que resulta imprescindible", sinalan dende o goberno municipal.

 PUBLICIDADE

Preme na imaxe para obter máis información.

Dende o Concello quérese recoñecer non só a súa longa traxectoria profesional, senón tamén a súa boa disposición ao longo de todos estes anos. "Alfredo deixa atrás unha etapa laboral, pero leva consigo o cariño e o recoñecemento de toda unha vila. Agora tócalle gozar do tempo libre, da familia e de todo aquilo para o que durante tantos anos houbo menos tempo. Desexámoslle de corazón unha moi feliz e merecida xubilación".